搞到全城瘋狂嘅中行，總算塵埃落定，呢兩日暗盤價升番啲，去到$3.2，但首日掛牌實際收幾多，就要到時先知；之不過華華就收到風，做阿仔嘅中銀香港，為咗恭賀阿媽成功上市，專登喺聽日──中行上市當日，利用中銀大廈外牆嘅「冷極管系統」光管，設計9組唔同嘅燈飾，幫阿媽慶祝。
呢9組燈各有名堂，分別係「3988」、「生機盎然」、「節節向上」、「火樹銀花」、「耀目輝煌」、「承先啓后」、「氣貫長虹」、「携手並進」及「喜氣洋洋」，效果係點暫時未知，但全部主題都鬼咁好意頭，相信股民未睇都已經好受落。
中銀話，今次搞特別燈飾慶祝，錢就唔使點用，只係改一改燈飾嘅程式就得，每晚6點半閃到午夜，咁唔理大家有冇抽中行都好，家吓行海旁，都多樣免費娛樂啦！