近年大陸經濟嘭嘭聲咁飆升，好多香港銀行都為咗呢塊未來仲會再肥啲嘅肥豬肉，鬥快喺內地城市開分店。
華華噚日就聽聞，嚟自新加坡嘅星展銀行，又喺上海盧灣開多一間支行，為隆重其事，星展主席許文輝（圖左）仲獻出佢嘅第一次：首次到中國訪問！
除咗許文輝、，大家好熟嘅副主席兼營運總監黃鋼城，都有出席噚日盧灣支行開幕禮，同盧灣區副區長江小龍（圖右）為揭幕禮舞獅點睛。許文輝除咗主持盧灣支行開幕外，今日仲會再主持星展蘇州分行揭幕禮。星展93年喺北京成立駐華辦事處，93及95年分別喺深圳同埋上海開設分行，𠵱家仲繼續開緊。
華華諗，許文輝咁難得先到中國一遊，會唔會順道拜訪吓內地銀行呢？反正近排新加坡企業咁鍾意出去買嘢，而內地銀行又咁想引入外資，如果一個唔覺意咁執番件好嘢，真係不枉此行喇！