唔知點解，歐美遊戲極之熱衷血腥殺戮玩法，要幾古怪變態都有！每隔兩年出動一次嘅最強殺手Agent47，喺新作《Hitman:BloodMoney》不但為錢繼續殺人，更要因應唔同任務而假扮侍應、警衞嚟掩人耳目，其隱密潛入及殺人手法更令機迷大呼過癮！
文：陳福榮
《Hitman:BloodMoney》係呢個著名殺手系列第四作，前3集各有不同主線故事，全部都係由光頭猛男「47哥」擔正。初代《Hitman》誕生於2000年，當時僅得畫面麻麻嘅PC版，之後02同04年分別推出延續篇，兩者都有XBOX及PS2版本，分別交代47哥喺唔同時間嘅殺手歷程。今集就算係正正式式嘅續篇，無論劇情、系統或畫功都係歷來最堅，未玩過之前幾隻都可以趁今集品嚐佢嘅獨有魅力。
武器勁多錢搞掂
副題叫得做「血汗錢」（BloodMoney），遊戲當然以金錢掛帥。任你用靜雞雞方法，又或百人斬殺法過關都得，適合鍾意玩《MetalGearSolid》及《RainbowSix》嘅機迷。不過殺手係唔會亂開槍冧友嘅，因此新作以賺錢系統增加難度；電腦會因應玩家過版時表現而決定「派彩」，愈專業賺嘅錢就愈多！換言之避過所有人嘅注意完成任務，就算係最專業嘅過關方式，隨之能買到更勁抽嘅武器，故此殺得人多未必有着數。
扮鬼扮馬完成任務
由於想令玩家盡量喺「零殺人」嘅情況下解決目標人物，唔觸動警衞惟一方法就係躲避同埋同化。由於通往目的地嘅方法多不勝數，最理想固然係搵到完全避開警衞與途人視線嘅路線，所以今集就新增好多動作，如攀爬矮牆和倚靠屋外窄位慢行等，似足扮忍者玩《天誅》咁款。當苦無捷徑時，只能走近特定人物，靜悄悄做低佢兼攞埋套衫，扮成侍應或警衞，不過一定要小心處理屍體，否則俾人發現就大鑊，玩過《SplinterCell》HardMode就深明被幾十人圍死嘅滋味。
宿敵居然係烏鴉軍團
今集故事延續自第二集，亦即47哥救番善心神父之後嘅事，雖然主角想抽身脫離組織ICA，不過殺手係條不歸路，俾你知公司咁多機密點掂？加上行中頂級殺手TheAlbino唔想再被47哥騎住，憤而向主角作下戰書，旗下複製人所率領嘅烏鴉軍團更非善男信女，光頭殺手想唔玩落去都唔得！順帶一提，呢隻超暴力遊戲係成人指定，血腥程度可見一斑，好此道者當然飲得杯落啦。
PROFILE
遊戲類型：動作
對應機種：XBOX/XB360/PS2/PC
遊玩人數：1人
開發廠商：Eidos
