今日係端午節,大家享受緊難得嘅公眾假期時,有冇諗過社會上仲有好多弱勢社群,需要關心同幫助呢?唔好以為蘭西轉行做社會服務版,只係見到一班平日為咗搵錢可以六親不認嘅地產代理,都肯犧牲寶貴時間,趁佳節做善事探訪老人,有啲感觸啫。
中原精英會早兩日探訪香港家庭福利會土瓜灣長者中心,送上唐餅、蛋糕,仲一齊玩吓遊戲㖭。美聯嘅義工組織美善會,就聯同大窩口循道衛理亞斯理社會服務處嘅員工,去荃灣大窩口邨探訪200位獨居長者,送上糭子同水果,應節之餘帶啲關心同善意畀一班老人家。
除咗趁大時節做善事,唔少代理行都會搞吓應節聚餐,世紀21一班後勤員工就搞咗個「百家糭派對」,由員工自攜家中自製糭子返公司齊齊食,總共有十幾款,原來大家都幾有創意喎。