葉劉仲未辭官浸鹹水前，一向都鍾意着到靚一靚，花枝招展。到咗𠵱家無官一身輕，更加自由自在，着乜靚衫都得啦。不過，要着得靚，都要身形OK先得㗎，所以葉劉一邊專注讀書，一邊就專注減肥，同時下女士一樣，追求瘦身為樂，結果總算冇白費心血。
啱啱去完美國探葉劉嘅詩姑梁愛詩，噚日都不得不讚葉太瘦身成功，𠵱家唔單止苗條咗，人又靚咗，仲覺得葉劉活得輕鬆咗同開心咗。詩姑仲大爆，話葉劉好快會返香港，唔知到時大家有冇機會睇睇，葉劉係咪真係瘦咗又索咗？到時佢會唔會有力同啲明星仔爭吓做纖體代言人呢？
問到同葉劉傾咗啲乜？詩姑話真係冇乜嚴肅嘢傾，事關葉劉每次返香港，大家都有聚會；有嘢要傾，都唔使等去到美國先傾啦。八方下次都係問吓佢兩個傾咗啲乜乜女人經仲好。
爆料熱線：29290000、27860099
報料傳真：26239278
報料電郵：[email protected]