噚日崇光搞咗個飯局，同傳媒講吓近幾個月經營情況之餘，又講吓同香港figure設計師MichaelLau嘅合作。席間，崇光副總經理盧少慧話，喺上海開久光百貨，佢哋真係學咗唔少嘢，除咗喺經營模式上學到嘢，仲發現有啲顧客嘅態度相當特別。
到底有幾特別呢？盧少慧話，有次突然有個爆晒缸嘅顧客走嚟搵佢哋，聲稱係因為撞到佢哋一塊玻璃，所以搞成咁，要求賠5000元醫藥費！佢話初時梗係唔畀啦，等check清楚之後，原來佢特登搵塊冇貼警告字樣嘅玻璃嚟撞，重要咁啱閉路電視都影唔到㖭！
盧少慧話有諗過報警，但由於大陸係要舉報人去搵證據，佢哋又真係冇證據，惟有賠咗1000元畀個顧客，將件事了結。而為免再遇上咁「專業」嘅顧客，仲嗱嗱臨拆鬼咗塊玻璃！