銀行業今時唔同往日，雖則有人提倡5日工作，但做Teller嘅，一早就唔止返5日半啦，周六下晝及周日，不時見到佢哋企喺門口推銷，例如信用卡或理財產品，個個咁大壓力，服務又點會好？
華華收到一封讀者來信，話畀銀行誤導，佢自己中咗招，希望提醒廣大市民。
讀者喺一間銀行做咗一種「目標存款」，個存款計劃嘅利息跟同業拆息掛鈎。好多人都知存款利息低過同業拆息，但都有好多小存戶唔諗清楚，佢哋以為係筍嘢。而且個計劃以「上期利息」為基準計算（見附表），所以就算第一年嘅利息高，過三兩年變咗零利率。
街坊朋友去咗邊
華華記得，以前啲老人家去到銀行，有乜唔明，啲職員都好老實咁介紹最合適嘅，唔啱就會叫公公婆婆唔好買，直頭係街坊嘅朋友，所以甚得老人家信任。但𠵱家為應付Quota，乜都叫你買。其實銀行高層知否咁做是得是失？總之𠵱家除咗買股票，去銀行都要精明啲，咪俾人當做羊生羊太。
李華華
讀者如有任何意見或報料，歡迎發送電郵至[email protected]。