核心區寫字樓價係咁升，連帶搞到外圍地區啲商廈都貴晒，造價創新高自然不在話下，仲帶挈一啲無心插柳嘅業主賺番筆。
聽利嘉閣測量師行工商部經理朱亮恆講，一個尖沙嘴星光行業主想擴充業務，喺04年用583.7萬，買入長沙灣億京廣場高層2048方呎B室；跟手得悉樓上樓下都有大面積單位放盤，就飛身入市，唔使搬離星光行。
佢手揸嘅億京單位惟有放租，最近租約屆滿改為出售，畀個外區客睇中，用809萬買入，呎價3950創今年新高。原業主兩年賺225.3萬，升值38.6%。
呎價3950今年新高
聽講億京嘅呎價最高都唔過4000蚊。上月一個層數低少少嘅2376呎單位，成交呎價3219元，唔夠兩個月就已升咗731蚊（23%）一呎，夠晒誇張。
由於億京係區內甲級商廈，所以業主放盤叫價都好進取，𠵱家大部份都叫緊4500蚊呎。
原來億京都幾受外區客歡迎㗎，今個月頭就有個外區客用呎租19蚊，租咗個單位，比起市值17蚊呎高近12%；𠵱家已經冇晒租盤。
電郵地址：[email protected]