讀者Heero
在剛過去嘅E3展，3大巨頭SONY、任天堂及微軟都各出奇謀希望能成為機壇一哥，亦意味新一代主機三國時代正式揭幕。
SONY嘅PS3就好似三國時代嘅魏國，佔據着大片土地（市場佔有率），坐擁大量人才（遊戲及開發商）以及擁有最強大的根基（機能）。從多方面來睇，都係稱雄大熱門，具備統一天下嘅一切條件。而任天堂嘅Wii則像蜀國，人才不多卻重質不重量，即使資源有限，仍可憑諸葛亮嘅創意計謀建立功業。毋須多講，只要睇睇從孖寶兄弟、比卡超同任天狗就知其厲害。而Wii嘅新手掣設計，更可為遊戲界帶來新嘅衝擊。蜀國君主劉備，乃漢王朝之後人，以「仁」見稱；而Wii則係紅白機超任王朝嘅「後裔」，以對遊戲嘅誠意見稱，兩者可謂不謀而合。至於微軟及XB360，就好似吳國，以大量天然資源（龐大資金、電腦網絡及技術）為其最大後盾，以江南（歐美）作根據地，亦係不容忽視之一員。呢場大戰最終誰能「統一天下」，𠵱家尚言之過早，個人認為以各方面都有優勢嘅PS3最有機會，而Wii則憑其創意吸引機迷，殺出一條血路。XB360嘛……如微軟繼續想將佢變成一部超級電腦嘅策略不變的話，唔好意思，佢將好大機會成為大戰嘅犧牲品。
電腦男評語
好精采的一篇比喻論！以三國形勢論盡3大主機，有趣得嚟亦不牽強。電腦男主觀認為，新世代遊戲機中，任記Wii基本上不會跟PS3及XB360等「高科技電子零件」有太大衝突，正所謂各有各做。反而PS3真正對手係XB360，兩者均賣弄華麗畫面及高清影碟播放，最重要係互相搶奪遊戲廠商成自家招牌作，稍一分神者大有可能瞬間被擊敗！
＊今天來稿作者Heero及昨天之地獄海怪俠，請以來稿電郵補回真實姓名、身份證號碼（只須英文及頭4個數字），以便聯絡領獎事宜。
後記：近日收到不少讀者來信，雖然當中意見各走極端，但論點大多有Point，讚得有建設性，彈又不致太偏激，令電腦男獲益良多。刊登過幾位較出色嘅讀者來稿後，本欄須暫停接收稿件，事關遊戲精品已全部派發完畢！電腦男將更努力爭取代理支持，拿出更多精美禮品畀廣大讀者，待有機會定過題目再跟大家交流！