政府拍板喺添馬艦起政府總部，相信十拿九穩，特首準備定件西裝去地盤主持奠基儀式都冇問題。但係我阿利以幾廿年行走中環嘅經驗，呢幅地做政府總部其實唔係咁盞鬼。
點解？香港地產佬有句口頭禪："location,location,location"，話之你幢樓起到天花龍鳳，位置唔好就真係鬼睬你。
𠵱家政府總部加立法會嘅位置，直情踩正香港心臟嘅那片心瓣，中心嘅中心，俾各大商業重鎮包圍，一副盡收天下兵嘅龍脈格局。政府官員要去會晤各大孖沙，又或者叫四方群臣前來朝拜，方便至極，十分鐘內即到。簡直係絲羅願托喬木咁哀怨動人。
去到添馬艦嗰片不毛之地，後面條告士打道「fingling焚能」，嘈喧巴閉。隔籬係解放軍總部，加上靜英英嘅中信大廈，冇晒以前左右逢源嘅氣勢。以後啲高官約人去鏞記食飯，去香港會打牙骱，幾唔方便。
所謂地靈人傑，我哋班會計佬搵寫字樓落腳就最實際，永無假大空。𠵱家最緊要近機鐵站，貪佢可以做到lastminute先仆去搭飛機。家陣阿「勤力」搬咗去PP，開始聽到啲老細呻，話好唔慣。
所以話，搬去金鐘添馬艦，「擇使」。