恒指最多升過111點，最少只升24點，埋單有68點進賬。5月期指是日結算，6月期指略為高水18點，形勢屬於小好，不過大市彩池221億，唔多夠。短期咪睇得太好，做嘢都要將注碼縮細，有平C輪就買些少，股價升咗上去就放棄，因住貪勝不知輸。
滙控C輪9037：滙控（005）近排鍾意喺美國做得好好睇睇，返到本港則反反覆覆，吼住失驚無神跌些少之時，低買C輪，執些少就離場。
唔想太搏殺，揀9037。隻輪11月尾夠鐘，輪價51仙，溢價5.5%，槓桿率26.6倍（有效12.4倍），引伸波幅16.1%。隻輪比較遠期，對正股反應比較冇咁敏感。如果有信心捉得正滙控移動方向，則揀對滙控反應敏感嘅2228。2228喺7月初到期，輪價95仙，溢價0.7%，槓桿率14.3倍（有效12.6倍），引伸波幅19.4%。
交行C輪4639：交行（3328）見過5元，平收4.925元。好多交行C輪則跌價。去到月尾，轉月份，C輪溢價縮水，通常都係咁。4639就咁下跌10%。
吼低位，博4639反彈。隻輪8月中到期，溢價4.8%，槓桿率17.9倍（有效9.4倍），引伸波幅30.9%。隻輪溢價唔算平，炒呢隻，記得手快腳快，唔好諗住坐盤。
章盛