世界盃仲有10日，所以近排最潮嘅口頭禪除咗「你有壓力，我都有壓力」外，相信應該係「你捧邊隊？」新一代賭王呂志和（圖右）噚日出席嘉華國際股東周年大會後見記者，一班財經記者問完佢點睇香港同大陸地產前景後，亦不忘問一句：「呂生，你捧邊隊？」答案係：「德國！」
德國隊傳統上注重防守，機動性強，不過，呂志和揀德國嘅原因係「夠硬淨」。究竟佢係咪指龍門列文夠硬淨呢？不好意思，佢冇進一步解釋。
老竇捧德國隊，呂氏小賭王呂耀東（圖左）當然唔會逆佢意，但開賭最緊要平衡風險，所以佢話，除咗德國，都好睇好巴西同阿根廷呢兩支班霸。被問到驚唔驚世界盃影響賭場生意，佢話到時會喺賭場大廳整部大電視，希望啲賭客兩邊（賭枱同賭波）都落注。咁你落注邊支球隊呀？呂耀東笑說：「落注？我收注㗎！」