肥媽前晚喺灣仔會展演出《鑽石健康水慈善夜》，佢老公好體貼咁帶埋相機去幫佢影相，杜麗莎、麥德羅同赤子都上台唱歌，仲有余安安、周美鳳同郭秀雲推廣鑽石水。
陳志雲：唔想為難佢
肥媽一直喺有線主持烹飪節目，早前就同無綫陳志雲傾緊加盟無綫收費電視台，做製作資源部高級經理，專搞音樂節目，點知前晚肥媽話個合作告吹咗，佢話：「有線鄺偉茗叫我搵律師睇吓份合約，我以為有線簽幕前約，同無綫簽幕後約冇牴觸。不過我都冇搵律師睇，唔想任何一邊唔開心，咪打畀陳志雲話算數囉。」
肥媽話佢唔等錢使，無綫又唔係冇咗佢唔得，佢又話自己同有線合約到07年4月左右先完，有線仲未搵佢傾續約喎。馮仁昭打畀陳志雲，佢就話：「我哋尊重肥媽嘅意願，大家係識咗好耐嘅朋友，我都唔想為難佢。」
有線節目發展及製作總監鄺偉茗噚日就話：「我哋好高興肥媽尊重合約精神，今次件事唔會影響我哋同肥媽未來嘅合作。」鄺偉茗仲話嚴格嚟講有線同所有員工嘅合約，原則上都唔畀員工同其他電視台合作。
