東亞銀行主席李國寶身兼多職，忙到冇時停，但旗下間寶號卓佳喬遷之喜，身為主人家，點忙都要抽時間去睇睇，仲搵埋兩個仔民橋、民斌齊齊現身，而有廿幾個巴仙股份嘅新世界發展，就派出彤叔外孫杜家駒上陣，三個名門之後，一行埋就傾到冇停口，結果留番寶哥哥一人守門口迎賓。
劉明康下月南下講QDII
寶哥哥上周五先自爆，話會喺周末上京，同中國銀監主席劉明康見面傾QDII，周六去周日返咁頻撲，華華諗住先問候佢，之後再問傾咗乜？點知寶哥哥竟然碌大對眼，劈頭第一句就話問：「你點知我上北京㗎？」真係「貴人善忘」嘞。跟手佢即刻耍太極，話傾咗乜梗唔可以話你知！
但會後寶哥哥又爆料，叫大家等到6月26日，銀行公會搞午宴時，劉明康會嚟香港講嘢，有乜都等對方發布，家吓佢講咗，唔係好啱時候同身份。咁又係，到時對方唔認數，又或者有咩出入，咪撞大板兼鬧笑話？
正經事唔肯講，但一提起熱到爆嘅世界盃，寶哥哥即刻話：「我會去德國睇決賽，係個朋友請去嘅。」邊個？又梗唔話你知啦！咁邊隊有冠軍相呢？「好多隊我都好鍾意，巴西、德國同法國都係心水。」至於鍾意邊個球星，佢就點都講唔到球星嘅名，最終都係話「總之好多啦！」
李華華
讀者如有任何意見或報料，歡迎發送電郵至[email protected]。