銀行宣傳手法次次新鮮，以往出動高層讚花香，家吓就搵自己啲客拋頭露面拍廣告，煞食之餘，又唔怕畀人話HardSale。
好似噚日出街嘅恒生廣告，搵OTO老闆葉志禮做真人騷，講番佢多年來大起大跌嘅生意路，最後梗係大步檻過，事關背後有銀行做「靠山」！
葉志禮話恒生喺拍廣告前兩星期搵佢，咁做咗咁多年推銷員，覺得都可以試，咪應承囉！佢話1分鐘嘅片，足足拍咗12個鐘，為一個天灰灰嘅鏡頭，朝早6點就要開工，古仔係自己，對白就梗係自己度，咁辛苦有冇人工呢？答案係「冇」！不過冇所謂，大家搞好關係，以後有乜嘢都好易傾啦！
衰過好多次
OTO喺香港有40幾間分店及銷售點，生意由百萬做到過億元，葉志禮話都衰過好多次。
金融風暴要賤賣資產，沙士7日都開唔到一張單，投資大陸又畀翻版害到無啖好食，全部有血有肉；而最開心嘅係84年，第一次成功賣出啲客當係死光槍嘅按摩棒。