滙豐王冬勝繼之前銅鑼灣開分行搵容祖兒剪綵之後，今日喺屯門有新店開張，又請到歌手古巨基主禮，不過唔知係路途遠，定有其他原因，冬冬今日唔會現身，只係派亞太區個人理財業務總經理方兆德，同埋亞太區個人理財服務及銷售主管區佩兒助鎮。
華華聽聞，鍾意明星嘅又點只高層，分行嘅員工對睇明星都好有興趣，會不時提議請邊個嘉賓，只要人選形象健康，冇負面新聞，獲批嘅機會都幾高。
咁睇嚟做滙豐員工都幾多嘢玩，好似呢排喺滙豐總行樓下，多咗兩個Cyber到震嘅大圓筒，原來佢哋搞緊員工攝影展，之前仲搵退休集團主席龐約翰做開幕主禮嘉賓。
公關話，呢個攝影比賽，自02年開始年年都搞，全球員工自由參加，而13幅得獎作品會製成年曆（封面加12個月），而得獎者有成千美元獎金，今次係第一次展出歷年得獎作品，展覽到6月3日，想睇就行快步。