有日見到同事Joyce將兩條蕉收埋喺櫃桶，問佢點解唔即刻食，佢話：「等我教精你啦，梅花點香蕉最甜最好食。」係咪真㗎？:O
噚日同家庭醫生關嘉美傾偈講開，佢話梅花點香蕉真係甜啲，而蕉皮起咗梅花點，顯示存放耐咗，而生果存放愈耐，果糖就自然增加，所以會甜啲。不過正因為咁，梅花點香蕉比一般香蕉多糖份，食得多易肥，而且任何生果擺耐咗，爛嘅機會就大，所以唔好食咁多。等我快啲同Joyce講，咪等佢肥晒先去減。:)
另外，前排我喺呢度講過即食麵係無蠟，結果收到好多網友回應，既然咁多人鍾意食即食麵，等我講多樣嘢你哋知啦。
近來有醫貓，話煲緊麵唔好落味精，因為會釋出有害物質，而出前一丁麵嘅包裝，都寫住要熄咗火先加調味料。
講到似層層咁，我咪寫封電郵問吓製造商日清，佢哋回覆澄清調味料冇含有害化學物，就算明火煮都無問題。咁點解叫人熄火先加調味料吖？佢解釋係因為用明火煮，調味料嘅味道同香氣，會因大大受熱而過份揮發，唔夠原汁原味，而且，用明火煮加咗調味料嘅湯，會容易黏底、燒燶，而且唔易清洗。咁大家明啦?!:)
逢周二刊出