嘩！讀者David你做咩呀？扮巴士阿叔嚇我呀？你有壓力我又有壓力，仲話我喺呢度講大話呃讀者？不如你諗清楚自己講咩先喇！係，你部Domingo嘅駕駛席的確係高，可以睇到嘅嘢係遠過我哋啲Corolla，但係你要記住自己部車輪胎Size唔係大，再加埋車身又高過人，高速過彎時會令車子的重心側去某一方，若路面有問題（例如凹凸不平或有油污），嗰時就真係有4驅都救你唔到！
仲有一樣嘢，你成日同我哋講話唔係成日開快車，但點解我每次坐你車行屯門公路或者青嶼幹線嗰陣，部車都會喺唔夠半分鐘內行晒同一方向所有行車線，我想問吓呢啲叫做咩呢？咪叫左穿右插囉！無錯，每次咁做你都會先打燈同望鏡，肯定無車先Cut線，但馬路情況跟天氣一樣變幻莫測，話唔定你Cut緊線嗰陣突然有部車衝埋嚟，隨時會有意外發生㗎！唔通你已經唔記得咗某次你在屯門公路，被一部日本版本田Accord突然切線，嚇得自己驚惶失措而發生意外咩？仲有呀，在快速公路行車時，喺左邊爬頭係犯法㗎，所以我喺度奉勸你一句，小心揸車啦！
記者：鄭達基