孫柏文大大話話都應該同過百萬人次，講過買實貨白銀，因為一定升到金手指篤過嘅120美元一盎斯。當然，有人信，有人唔信。唔信嘅人唔講，今日淨係講信嘅人，即係你哋班《金手指》fan屎。孫柏文睇大家嘅來信，相信可以喺信者當中，分成兩大類，第一類就係問我邊度同點樣可以買白銀，第二類就係想買實貨白銀，不過因為種種理由未買。有啲fan屎怕煩，唔知究竟好唔好擺白銀喺床下底，抑或保險箱，而有啲fan屎就唔鍾意買白銀，因為冇息收。
其實，係有一個方法，買實貨白銀不單止唔使煩擺白銀喺邊度，仲要有息收。我相信當今世上，好多相信孫柏文話白銀會升嘅大鱷，都已經用緊呢個方法，去𢱑住啲實貨白銀。
呢個方法就係將手頭上嘅實貨白銀，借出去。大家可能會問：「借實貨白銀出去？借畀邊個？邊個會借？借嚟做乜？」問得好！假設你係一個中央銀行行長，國庫裏面有好多實貨白銀同黃金，多年嚟，啲白銀同黃金都係冇息收，不過你覺得冇所謂，因為一個貨幣最終都係要有實物支持，長遠嚟講，先至可以確保世人對貨幣嘅信心。不過，你呢排又遇到班冇嘢做嘅立法會議員「監察」你嘅工作，佢哋又唔會批評你成功保護貨幣購買力，因為佢哋既唔識又唔明貨幣政策。佢哋只會麻木地批評你控制嘅外滙儲備「回報不足」。
1年收息6厘
咁你又冇氣去糾正，因為佢哋已經無藥可救，不過又唔想影響世人對你隻貨幣嘅信心，唔想賣出手頭上實貨白銀同黃金，所以正當有人同你講，話想問你借實貨黃金白銀，承諾到時到候連本帶息還返畀你，我相信你都會覺得幾好。因為第一，你仲可以同世人話國家仲有好多黃金白銀；第二，又可以收息。
借實貨白銀同黃金嘅人，跟住就可以喺金銀市場上興波作浪、炒上炒落、舞高弄低去賺錢。去到最後，借貨嘅人就大大力打壓白銀同黃金嘅價錢，用低價買回實貨還番畀你。大家聽到呢度，可能會追問：「借實貨白銀出去可以收幾多息？」根據上個禮拜五花旗國期貨市場收市價，如果你肯借實貨白銀出去，要人哋1年之後先至還，可以收6厘息。冇錯！好過入錢喺銀行收息，或者買花旗國債券。
我相信作為《金手指》啲醒目fan屎會問：「咁筍嘅嘢，點解你冇用隻金手指篤畀我哋？」金手指冇篤過嘅原因，其實好簡單，就連我6歲大嘅姪仔Louis都會明白。有一日，我坐喺Louis隔籬，睇住佢做英文功課，我見佢嘅筆筒裏面有好多支唔同顏色螢光筆，咁啱我又做緊功課，刨緊馬經，所以我就問Louis：「叔叔可唔可以借你啲螢光筆用？」佢即刻答：「No！」
我再問：「借螢光筆畀叔叔，還番畀你嘅時候，請你食雪條？」
Louis：「你都唔會還畀我，點請啊？」所以嗰日我冇買馬，最後我仲教佢一個新英文字，就係「Default」，相信比astronaut同chimpanzee容易。
回歸正題，借實貨白銀出去，要冒嘅風險，就係借貨嘅人還唔番畀你。你𠵱家可能唔驚，不過銀價一個唔覺意升到120美元一盎斯嘅時候，你就真係分分鐘冇晒啲白銀，因為對方冇錢買貨還番畀你。仲有，世界各大中央銀行真係將手頭上好多白銀同黃金借咗出去，如果有一日，各大中央銀行同時間宣布，佢哋已經冇晒白銀同黃金，唔好話孫柏文冇講過。
孫柏文