有說男人結婚因為倦，女人結婚因為好奇，但一紙婚書始終係一個承諾，絕不可馬虎！《獨家試愛》講的是現代年輕人愛情及婚姻態度；新婚老公偷食搞婚外情，老婆嗌離婚，又結又離認真兒戲。玩完玩罷發覺最愛係老婆，又俾佢𠱁得番喎！女觀眾當然唔忿氣，至於男士們梗係幻想自己係男主角啦！
記者：招佩珊
《獨家試愛》DVD
聲效：dts、DD5.1（粵語）、DD5.1（國語）
字幕：繁簡體中文、英文
發行：美亞娛樂
片長：98分鐘
價錢：$69
將年輕人拍拖、結婚的寫照搬上銀幕，故事很普通，但很實在，由葉念琛編導的《獨家試愛》，講的是新一代男女的愛情態度，情節簡單，但卻將他們對感情及婚姻的鹵莽草率、猶豫不決，直接表達出來。不賣弄花巧，反而更有真實感，還以為寫的是自己的故事。葉以往的電影編劇作品如《龍咁威》、《大丈夫》及《我要做Model》等，當中不乏爆笑橋段，今次在《獨》亦有輕鬆笑料，有得喊有得笑！
閃電結婚賤夫偷食
故事由男女主角結婚開始，方力申與鄧麗欣（Stephy）飾演的一對小情侶愛得熱烈，只因「我愛你」便閃電拉埋天窗。本以為生活從此甜甜蜜蜜，可惜，新婚不久二人漸生猜疑，磨擦漸多，方更搞出婚外情搭上中學時替他補習的靚姐姐吳佩慈；方與鄧由熱戀到冷戰，之後更嚷着離婚。冷戰期間，一男兩女的拉鋸纏繞不清，及後鄧巧遇伍允龍飾演的廁紙專家，男有追求之意，女亦照單全收，三角戀變成四角銼！故事都幾中時下年輕人戀愛態度，情到濃時唔使諗咁多，婚話結就結；遇身邊朋友早結婚或閃電結婚，有時都會諗「睇你好得幾耐」，你話黑心咩？呢個係好現實的問題。正如戲中方與鄧好友都分別向二人講，結咗婚就一世，言下之意係諗清楚未？結婚唔好衰衝動！
愛情警語一針見血
方鄧二人是故事發展重心，另發現戲中其他角色亦講愛情道理，比如因二人鬥氣錯失參加特惠旅行團機會，換來旅行社職員一句「家陣先走嚟後悔」；另外，追求鄧的廁紙專家伍允龍，打邊爐時一句「畀個機會自己試吓新嘢」，示範整再造紙又話「重新嚟過」，唔理講者有心定無心，句句可謂擊中要害，么心么肺，雖是老生常談，但嗒落有味。一輪兜兜轉轉後，還是覺得你最好，和好如初；不過，臨尾只見方仍與吳互通短訊，而鄧則偷偷寫信畀追求自己的後備伍允龍，相當弔詭！方與鄧在《獨》中幾有驚喜，尤其是結尾方力挽婚姻的一幕，方一邊勁講對唔住，一邊流晒眼淚，又話自己好，叫鄧唔好唔要佢，見佢喊得咁淒涼，真係感動到人，更有可能係感同身受。
激咀場面內情大踢爆
Bonus的製作特輯，有編導及演員講吓佢哋對時下年輕人婚姻同愛情觀的睇法，而拍攝激咀場面時，鏡頭外男女主角同導演玩互相踢爆的一段最爆笑，一時方話畀咗五百蚊收買導演，先至有得NG咀完再咀，鄧又話要㩒住對方，怕佢咀到唔識停，而導演講咗句好擔心卻換來方的一巴掌，係難得唔會睇到眼瞓的特別收錄。
