數碼影音：小白DC追臉對焦唔怕你郁

最新推出嘅Nikon纖薄型數碼相機COOLPIXL3，屬500萬像素級別，外形與同系前作相比，線條更為圓滑吸引，多咗啲曲線美，加上使用人見人愛嘅白色機身，外形都算係落足心機，再加上具備Nikon獨有追住臉部對焦功能，影人像更係Easy！

記者：許福合　攝影：陳盛臣　ImageGirl：Zoe

講功能級數，L3未必係最強最勁，不過勝在外形大眾化，功能齊備嘅同時，操作亦算簡單易用，對一般用家影吓生活照、旅行相片就相當適合。

$1,680

小巧純白易操作

L3具備銀、白兩色選擇，不過以白色較為搶眼，因銀色DC市面上已多不勝數，白機在觀感上自然特別得多！由於L3定位係讓用家隨便拍隨便影，機身上亦無複雜功能鍵，只係有簡單幾個模式鍵同十字掣，只須簡單幾個掣就可影到相。機身使用曲線線條，除較美觀，揸上手更啱手形，尤其手柄位，手感相當唔錯，即使按下快門拍攝，亦有助將晃動減到最低，影出嚟嘅相就更Sharp！
不過機背LCD真係要彈，今時今日新機居然只有2吋屏幕，明顯感到不足，試落真係有啲唔慣。L3基本規格為500萬像素，配Nikon原廠鏡，提供3倍光學變焦，焦距為28-116mm，一般感光度、測光設定都由相機包辦，拍攝時可透過加減曝光補償調節，總之一切以簡單易用為主。

追臉模式對焦準

雖然操作簡單，不過從菜單已可感受廠方花過唔少心思，功能分類整齊，配合多層式目錄結構，第一次用憑直覺就可搵到，好方便。
較為特別及好用，首推「臉部優先」功能，即係臉部對焦，呢個功能拍攝人像相當好用，會自動找到臉部對焦點，有時找路人甲幫忙影合照，都可以確保對焦準確，唔怕初哥搞到相片鬆散！操作反應尚算不俗，開機大約2秒左右，連拍1.4fps，一次過影5、6張才會感到慢下來儲存，再加上使用近期少見AA電芯作電源，要換電池自然比專用電方便。