郭羨妮演出緋聞男友殼王陳國強公司投資的電影《臥虎》，不單受到特別照顧，每次開工有四名保鑣護駕，戲中她與曾志偉做情侶，卻可例外地完全沒身體接觸，難怪志偉也帶笑埋怨「未咀過、未拖過」。
由王晶監製、麥子善與王光利聯合導演、曾志偉與余文樂等主演的《臥虎》，前晚在九龍灣展貿舉行記者會，這部男性電影，女角戲份有限，郭羨妮雖說是片中唯一女主角，但戲份只有四天，不過她受到的待遇，勝過任何一位男主角，日前在旺角街頭開工，電影公司特別請了四名保鑣貼身保護，到前晚她出席開鏡禮，一樣有四名保鑣保護，派頭殺晒。
保安兼護志偉
雖然王晶解釋上次在旺角街頭拍戲，因為環境太雜，所以才請保安，他說：「啲保安唔單止保護郭羨妮，志偉都保護。其實啲保安主要係防狗仔隊嚟偷拍，因部戲之前未取得批文。其實今日開鏡喺室內我都覺得冇需要保安，但宣傳公司叫咗嚟，我都唔清楚。」
曾志偉與郭羨妮在戲中演情侶，但今次就沒有任何艷福可言，他笑說：「戲入面，我同郭羨妮係就係情人，嘴又未咀過，拖又未拖過，佢就死咗啦！」對於郭羨妮開工獲厚待，志偉表示：「咁又唔係嘅，上次喺旺角街邊拍戲，連坐嘅地方都冇，請保安喺現場合理嘅。加上部戲有郭羨妮做，實有好多記者嚟偷拍，請保安護駕可以理解。」
「陳生冇探班」
郭羨妮每日開工有四大護法保護，好不風騷，記者問她與殼王緋聞鬧得熱烘烘會否擔心影響形象？她說：「外間嘅事，我唔會理，總之公司叫我接呢部戲，咁我就會拍，我係對件事，唔係對人，所以就算下部戲都係陳國強公司投資，但劇本好，我一樣會拍，唔會理咁多，呢部戲開工咁耐，陳生冇嚟過探班，大家唔好亂猜。」
採訪：魯萍攝影：陳順禎
