內地3G牌照仍未有聲氣幾時發，一路都係聽到樓梯聲，但就鬼影都冇隻，不過，營運商同設備供應商都唔會齋等。好似生產各種無線通訊解決方案嘅中國無線科技，近日就搵咗楊賢足做獨立非執行董事，幫佢出謀獻策。
楊賢足係邊個？就係聯通上市後，首任董事長兼首席執行官，佢由00年做到03年先至退休，讓位畀王建宙。佢嘅背景就仲厲害，65年喺武漢郵電學院電話電報專業畢業後，就一直喺郵電部做，90至99年間更出任郵電部及其後嘅信產部副部長，之後先落去聯通坐鎮。
咁嘅來頭，唔怪之得中國無線都搵佢啦，由5月26日起，佢已成為公司獨立非執行董事，初步任期1年，每年基本董事袍金12萬元人民幣，另加酌情花紅。楊氏現時亦為東風獨立非執行董事。