王兟公布入新橋投資個阿媽TPG（德克薩斯太平洋集團）做合夥人之後，好多中環精英（入咗貨買威利嗰班基金佬）至為關心嘅係，到底有冇信錯佢買錯貨？嗱，兟哥啲售後服務一向出名好，前日出完新聞稿，噚日再整多劑電話會議補飛，一如華華所料，兟哥人響中環，都會隔空幫北角嗰邊頂住，因為佢𠵱家有份話事、管住300幾億美金嘅TPG，隨時會入股投資威利！
兟哥話，佢有好多瓣生意，唔會瓣瓣都坐定定睇住，而威利就係佢眾多投資之一，佢𠵱家都同威利探討緊進一步合作，稍後如有機會，TPG都會投資埋一份……即係點？淡定有錢剩囉！不過，佢補充話TPG係講團隊合作，絕唔係佢話邊樣好就投資，要睇過值得先會做。再者，公還公私還私，佢冇義務將自己啲私家好嘢畀TPG……
咁TPG又會唔會投資以前由佢揸弗嘅TOM仔？兟哥話佢答就唔公道，因為佢響TOM仔做咗咁耐，家吓仲揸住TOM仔股票，所以唔應該公開討論或回應，之不過內地生活水平不斷提高，媒體前景一定好，TOM仔係一間愈嚟愈好嘅公司……不愧為雲南一級sales！
兟哥未同二少搭上
至於兟哥點解入TPG，佢話TPG管咁多錢又畀佢做合夥人，仲要冇行業限制，畀佢發揮小宇宙……咁新橋入股二少檔盈科拓展呢單刁，兟哥話佢啱啱先返工，之前入股聯想、深發展等等都係啲同事做……即係話佢未同二少搭上囉！