博彩股繼續多消息，麗星郵輪（678）就因為同包括阿媽在內的財團未能成功投得星洲賭牌，昨日股價勁跌，最低見過1.25元，收1.38元，大跌17.86％，喺昨日成交淡靜的日子中特別矚目。
相反，金沙成功投得星洲賭牌，刺激為澳門金沙貴賓廳做叠碼仔的浩基（628）股價扭轉近日跌勢，昨日勁升16％，收1.81元。
中航興業舊聞新炒
但經紀黃話，其實浩基唔係呢個理由扭跌為升，早排浩基喺2元水平跌落嚟，揸重貨的對沖基金PMA，逆市增持千幾萬股，對股價有承托至真。
除咗賭股外，經紀黃叫小初留意航空股，尤其係中航興業（1110），因為呢排淡市中，中航興業股價表現強勢，應事出有因，估計和旗下港龍航空持股架構可能重組有關，有機會舊聞新炒。
中航興業昨升5.46％，收1.93元，成交金額4418.4萬元。
慕容小初