香港無嘢好蒲？年輕人，請將眼光放遠少少去澳門。咪誤會，唔係叫你過大海賭兩手，而係提議你蒲夜總會見識吓。「『蒲』？夜總會攞嚟『蒲』嘅咩？我邊『蒲』得起呀？」無吹水，只要你年滿18歲夠秤就蒲得起，一句到尾$200入場包2杯飲品。堅定流？咁平有啲掛羊頭賣狗肉Feel喎？話之佢，總之放低$200就可以Hea足成晚睇艷舞，男生們聽到呢個消息好興奮？不過咪諗住可以撇低女友過大海？Sorry，女生一樣招待兼同價，拍住拖去都得。
記者：黃藹瑩
攝影：陳陶鈞
模特兒：Jeff、阿峰
睇定相過大海
咪誤會，呢版係〈Hea〉唔係〈夜生活〉，絕對無意鼓吹年輕人過大海跳舞。不過咁，$200，一個可能連買件Tee都未夠嘅價錢，可以畀機會未見識過甚麼是夜總會嘅年輕人蒲一次半次夜總會，人一世物一世撐吓都抵。仲記唔記得半年前光榮結業嘅香港中國城夜總會？事隔半年，以全新姿態包裝喺澳門氹仔再戰江湖，改名「帝國迷城」，走時尚化、主題化、年輕化同平民化路線。入到去，你見唔到刻意堆砌嘅金碧輝煌，大廳無計小姐Escort嘅計時器，連以前N咁多盞射燈懶豪華嘅大舞台都欠奉，相反會有主題房、吧枱、XBOX360。心郁郁想見識？睇埋相先，睇定先買船飛都未遲。
1.老實，無呢個平民價，我都唔會坐成粒鐘船過澳門，不過再次聲明，$200包2杯無酒精飲品，淨准你同班Friend任Hea睇番場艷舞Show（每晚7:00pm至8:00pm開Show），其他服務一概欠奉，咪天真到以為會有小姐陪坐，想見識多啲唔該帶多啲錢。艷舞Show唔只台上3位北方佳麗，月中開業會有大量外援，衣着亦會比呢3位姐姐更性感，最重要係佢哋真係能歌善舞，唔使擔心係悶Show一場，真係驚悶？四圍參觀得，帶定副啤牌去潛烏龜都仲得。
2.電梯一開門即見呢個大「金魚缸」，「金魚缸」以羅馬式庭院做主題，負責人更把「金魚缸」易名叫「後宮」，每晚6:00pm廿幾位佳麗就開始進宮，擺出誘人姿勢兼散發勾魂笑容，男生們咪走雞呀。
3.夜總會有四正化妝間，仲有專業化妝師同髮型師幫小姐們搞形象，十足十Artist出Show喎。有7年髮型設計經驗嘅Alan話：「我同成隊Team都係喺香港過嚟，因為唔想啲小姐們化妝太過風塵Feel，所以夜總會特登請我哋嚟搞形象設計，等個個小姐都有多啲時代感。」
4.有10間主題房同8間VIP房，理論上，主題房唔設最低消費，有位又夠人數嘅話一樣照准你坐，不過唔搵小姐陪坐嘅話又好難淨飲橙汁又坐房，明㗎呵？8間VIP房都有大床，模特兒試瞓話仲舒服過自己屋企張床，不過就設最低消費$25,000。
5.帝國迷城幾千萬豪裝，最揼本莫過於一盞盞燈飾，全部由外國空運到氹仔，舊式夜總會無咁靚燈飾你睇，而大堂樓梯一排纏住扶手嘅扭花燈飾就全場最貴，值過百萬，每件Parts都由布拉格運來，重要請師傅專程到澳門鑲嵌。
6.話明係全新夜總會，點少得一兩件「高科技」產品？喺款待處，Reception姐姐會教你用呢個電腦TouchScreen訂房板，除展示夜總會每間房間嘅樣貌同裝修外，兼處理埋訂房服務，不過想問，既然都嚟到夜總會咯，點解仲要用個板訂房？唔明！
7.難得肯放心思儲存紅酒，設計師特別將酒室設計成龍潭一樣，不過又想問，唔知龍同酒有乜關係呢呵？
8.大堂地板都有個名副其實嘅「金魚缸」，不過呢次係個投射式金魚池，池裏面有電腦金魚，未知投射魚池同風水格局有無關，不過只要你一踏入池中，金魚就會俾你嚇走，而且仲會發出淙淙水聲，好搞鬼。
夜總會人Snapshot
勁紅Dino
做DJ兼演奏鋼琴嘅Dino，係澳門出名唱片監製同唱作人，仲出過碟，可能比Solar更紅。
靚女Mona
若然大家有睇過中國城結業篇報道，就一定見過呢位由香港過檔澳門嘅媽咪Mona姐，好靚女喎。
靚仔David
主管David，據說不論人客同小姐們都特別喜歡佢，點解？靚仔特別受歡迎囉。
玩後有感
（左）珊珊：「完全唔知夜總會係咁樣，畀$200嚟見識都值，女仔嚟玩都唔覺尷尬。」（中）Jeff：「話畀人知自己蒲過夜總會都幾過癮，過得澳門不妨到此一遊啦。」阿峰：「真係無多餘收費，$200就$200，當見識吓都抵。」
帝國迷城夜總會
營業時間：3:00pm-4:00am
地址：澳門氹仔金都酒店娛樂城2-3樓
電話：（853）886988
