美英股市周一冇市，港股噚日當堂靜咗，恒指雖繼續反彈，但只升68點，力度唔係好強，令人有少少失望，成交更大幅縮到只得221億元。中資股升勢就較為有力，H指有87點進賬，升幅1.3%。
短期後市點睇？有人話已經一次到底，有人就話反彈後再尋底，後者係𠵱家嘅主流，幾乎9成人都係咁睇，問題係反彈會上到幾多，而再尋底時，上次15627個低位又守唔守得住。
五窮六絕七翻身，第一個算係應驗咗，就嚟踏入6月，今年世界盃唔多唔少對個市都有影響，起碼市況會靜咗，成交亦會少咗，即使上次低位守得住，個市都唔會有大作為。到7月，世界盃打完，齊齊埋番位，個市又會再癲過。
個市雖仲未算真真正正反彈（個人睇有機會去番16300至16500），但有好多股票已開始捽㷫咗，好似上周五推介隻九洲發展（908），搶上0.92元高收，又升9.5%；而一直睇好嘅哈爾濱動力（1133），升勢持續，又進賬4.4%。另外，雅域（1229）同生命科技（1180）亦傳有料到。
利好因素多
成交走在股價前頭，九洲成交大增，股價跟住就大升。噚日，京信通信（2342）有一手大手1100萬股上板，全日成交就大升到1800多萬股，幾乎係兩年來嘅最高紀錄，股價就收2.325元，升3個位。
京信成交大增，有啓示。今年2月，京信股價3.45元，現時2.325元，跌咗32.6%，落到呢個位，開始有大戶上車，短期反彈個勢可以好勁。
京信股價下跌，主要係反映05年（12月年結）盈利倒退嘅因素，京信專門製造移動通訊網絡覆蓋系統，傳中國好快會落實發3G牌，京信肯定受惠，盈利亦可回升。德銀最新嘅研究報告就推介買入，預測06年每股盈利0.12元，07年可大升至0.28元，目標價係4元。
京信利好因素甚多，有：(1)主要客戶中移動（941）及聯通（762）表明會增加電訊網絡投資；(2)3G用TD-SCDMA制式，京信技術領先同業成年，而通過測試的同業亦只有2至3家，競爭比2G的近20家，大為減少；仲有(3)就係3G系統的投入估計超過3000億元，未來幾年，中國電訊網絡市場會好興旺。
郭兆誠