日股昨日先升後跌，但總算助好友早市挾高，令即月期指企在較高位結算，收復多120點失地。日股由升轉跌，港股午市升幅一度收窄至25點，好在尾市識得彈，最後仍升68點，收15963。
06年世界盃進入倒數階段，足球熱潮將席捲全城。上周六曾特首亦在電台大講波經，借「波係圓嘅」，大談團隊精神的重要性，可絕處逢生，可以強勝弱，勉勵香港市民要努力和團結，仲叫大家睇波學成功之道，在世界盃決賽周齊齊「學師」咁講。
可惜今屆「世界盃又在有線」，要睇足全部64場波要裝有線電視，睇嚟好多香港市民冇辦法睇世界盃學習「團隊精神」、學習「成功之道」，社會唔易進步。
其實上一屆世界盃由有線獨家播映，曾引起很多批評，很大的社會迴響，最後免費電視可以播最後4強賽事及決賽，叫做平息一些怨憤。今屆可能早有前科，在預期之內，社會上反應不再那麼激烈。
不過，有人依然為睇世界盃激氣（不是趙飛雲）。話說有個老友在上周三（5月24日）申請安裝有線電視，主要是睇世界盃，由於預期只睇三個月，因此不簽長約，但有線的答覆是排期安裝要1個月時間，但簽長約則可即晚安裝。想響應曾特首睇世界盃學成功，認真唔容易。
有線寬頻無謂憧憬
講起世界盃，趙飛雲近排都有留意有線寬頻（1097）的走勢，4月初低見1.70元，接近歷史低位1.64元後反彈，月初升至1.85元以小雙頂回落，近期在1.71元營造底部，昨收1.78元，冇升跌。睇番過去幾個月大行報告，一般睇有線睇得相當淡，主要是盈利受壓及前景不明朗，所以走勢一浪低於一浪，近期跌近1.70元回升，短期或再有反彈，但成交太疏，技術走勢的可信性不高，不宜沾手。
趙飛雲