投資賓架係大忙人，佢哋嘅對手、企業財務董事（CFO）又係大忙人，有時為咗安排時間見面，由朝早七點開始，每半小時一格，逐間睇，隨時睇到晚上七點，都冇互相方便、空閒嘅時間。曾經坐過監，現已反璞歸真專心做慈善嘅八十年代垃圾債券大王MikeMilken，在巔峯時期，每日第一個會議，自早餐開始，即紐約時間早上七時，華爾街開市前。之不過，Milken嘅基地喺洛杉磯噃，紐約朝早七點就係LA凌晨四點！米爾根咁早就起身見客，都唔知佢每日睡眠幾多個鐘頭。
投資賓架K每日晨咁早就起身，到馬會游水，七點鐘返到中環，晚上九點紐約開市，佢要同紐約講幾輪電話，經常冇時間食餐舒服啲嘅晚飯。某日佢早上七點幾就去到中環置地廣場文華酒店七樓，與CFO開早餐會議，傾密偈。所謂早餐，來來去去都係煎雙蛋、煙肉、麵包、生果、果汁等等，兩人埋單，唔係多，不過係一千大元多一點啫。左丁山知道之後，笑佢：「行過斜對面間麥當勞，兩人食早餐，五十蚊有找啩！」賓架K睩大隻眼話：「又唔係我私人畀！」騎騎，開公數係唔同嘅，做一個十億美元大Deal，食好多次一千蚊早餐都係濕濕碎啫。
記得以前聽過酒店天王AdriaanZecha嘅教導，佢話開酒店一定要開頂尖豪華級，牛市時，生意做唔切，因為收得貴，獲利率好高，到咗熊市，遊客少晒，生意不景，頂級酒店只要減價五成，就可以搶晒四星至五星酒店之間嘅房客，入住率唔會跌得太低。「置地文華」就係呢類Zecha所講嘅酒店，最近碰到嘅瑞士賓架，來港住響金鐘香格里拉，佢話住唔起置地文華喎！
辦大學、中學、小學亦係同樣道理，只要係頂尖名校，哪怕出生率下跌，學生人數減少吖。哈佛、史丹福幾時驚過收唔夠學生！香港生育率低，學童數目遞減，引致殺校成風，但去到大學階段，現時最多人揀嘅港大、中大，你估又會唔會收生不足呢？除非UGC搞硬性分配，實行大鑊飯主義啦。到時家長學生會上街抗議都有可能！