揭發獸父強姦女兒案件的阿May，被法官形容為不幸女童的守護天使。原來舉報事件時阿May認識女童僅個多月，但已察覺女童有異，並獲女童信任一同報警；她直指女童父親被判監十年刑罰太輕，難以彌補女童畢生痛苦。對於見義勇為行徑獲表揚，她淡淡然地說：「人人都應該咁做。」
為免暴露案中女童身份，阿May堅拒公開露面，她形容女童個子「細細粒」和精靈。揭發案件時，兩人僅認識一個多月，她說早已懷疑女童被虐，「手腳成日有一撻撻瘀痕，有日佢悶悶不樂，大髀瘀晒，話俾老竇打，想帶埋一歲半細佬離家出走，又話唔想做人。」阿May感事態嚴重，即時報警，怎料警員上門當着其父查問，女童對被強姦經歷難以啟齒，謊稱撞傷，警員沒有跟進。
認為判刑太輕
翌日阿May再見到女童，原來警員離開後，女童再被父親痛打及強姦，「佢一路講一路喊到劏豬咁，仲話以前俾老竇強姦咗好多次，好淒涼。」她隨即陪同女童到警署報警，警方才展開調查，「啲警察做嘢好有問題，點可能要個女仔當面指證老竇？」她透露女童早已向學校社工投訴被父親虐打，「到底嗰啲專業人士有冇攞個心出嚟做嘢？用心聽個細路女講說話。」
女童長於不正常的家庭。阿May稱，女童及弟弟乏人照顧，「佢屋企無洗衣機，所有啲衫都係佢用手洗，繼母瞓到晏晝兩三點先起身返工，兩姊弟個身成日有陣酸宿味，又成日無飯食。」她認為對獸父刑罰太輕，「被人侵犯一世受傷害，判佢老竇十年太輕，實際坐七、八年就出嚟，到時個女仔仲未夠二十歲，點樣面對老竇？希望社署會跟進個案，一直照顧佢。」
記者 馮婉嫺