小初上周講開濠賭股，經紀陳又話有料報，佢話大同集團（544）收購澳門酒店一事，差唔多搞掂，有興趣者不妨望多兩眼。
大同喺5月初公布，話打算收購澳門一間四星級酒店12％權益，據講呢間係銀河娛樂（027）新開幕賭場位處的金都酒店，金都搞得有聲有色，但大同股價表現唔算特別標青。經紀陳話，大同喺上周股市急跌時成功配股集資，復牌後股價表現硬淨，唔可以睇小。
大同上星期以先舊後新方式配股，每股0.116元，配售最多6億股，集資淨額6720萬元，當中約5000萬元計劃用作收購澳門酒店之用，餘額1720萬元將用作一般營運資金。雖然復牌後股價一度跌破配股價，但上周五已浮上水面，最高見0.127元，收0.117元。
小初唔敢睇小大同，但又覺得家陣大市氣氛不利細價股，尤其係上周有間證券行出問題，或多或少會影響股民信心，所以都係睇定啲先算。
慕容小初