特區政府果然愈嚟愈明白乜嘢係「親疏有別」。繼煲呔拉大隊去賀民建聯嘅議員開地區辦事處，許老爺去民建聯嘅路向營探班之後，噚晚主管房屋及規劃地政嘅孫明揚局長，又同埋太座一齊，去同地產建設商會會長何鴻燊一齊慶功，慶祝何老闆隻馬贏咗遮打盃。
咁孫局長主管公營房屋同賣地，賭王就係大地產商，大家咁熟，有啲社交聯誼，以今日特區嘅標準嚟睇好平常啫。記得幾個月前何老闆做大壽，一眾地產商在田北俊山頂大宅食大閘蟹同佢慶祝生日，唔只孫局長有去拆蟹，煲呔都拖埋太太一齊由白加道尾行返出白加道頭飲番杯，食番兩隻田夫人揀嘅靚蟹；既然地產商咁高興，「隻手遮天」嘅恩怨都一筆勾銷啦。
在呢一片「親疏有別」嘅風氣之下，相信唔使幾耐，就會見到政府嘅高中低層同地產商建築商乜商物商一齊唱K開P打邊爐，齊齊建設一個和諧社會。
傳真︰2623-9278
電郵︰[email protected]