萬眾期待嘅世界盃揭幕在即，新城趁機會舉辦新城公益金慈善足球王，幫公益金籌款，歌手鄭融、梁靖琪（Toby）、許懷欣、戴夢夢等噚日就去到荷里活廣場做嘉賓。母愛爆棚嘅Toby未出場踢波前已經抱住個BB係咁玩，原來個BB係佢fans嘅，Toby暫時幫佢抱住先。
好唔專業
Toby最近同吳卓羲（Ron）合作新劇，提起佢之前同阿Ron喺劇裏面拍嘅激吻同床上戲，原先心情靚靚嘅Toby即刻灰晒面，佢話自己拍嘅時候緊張到唔敢張開眼，但係佢喺現場睇嘅一個朋友就話阿Ron好唔專業，皆因阿Ron同Toby咀緊嘅時候，竟然係擘大眼，唔知阿Ron係想望真Toby，定係對Toby冇興趣，搞到要四圍望？
另外，有報道話鄭融同陳苑淇以前曾經爭男友，鄭融話佢初入行嘅時候，已經認識未入行嘅陳苑淇，仲話佢哋兩個都有一齊都識嘅朋友，所以先相識，至於爭仔傳言，鄭融話得啖笑喎！
