Peter：TradingDesk，Peter。
謝太：喂，唔該你Karen喺度嗎？我係謝太呀。
Peter：謝太，我係Karen嘅主管Peter，Karen今日病咗，不過謝太，都好耐冇同你傾過偈。
謝太：Hi，Peter真係好耐冇傾偈。Karen冇乜嘢嗎？
對沖手頭貨
Peter：原本佢今朝都有返工，不過我見佢喉嚨痛到出唔到聲，即係同啲客講唔到嘢，就不如放佢假。不過，Karen病咗，起碼畀咗個機會我問吓你，點睇Karen。
謝太：幾好呀，醒目女，做足工課，又帶挈咗我贏錢，真係唔錯。佢最好嘅地方，就係就算以前啲Sales都有Karen咁醒目，都叫唔郁我買嘢，不過Karen就可以，甚至可以話佢次次sell嘢畀我，我都會買。Peter，點解突然間會問我呢個問題？你唔係想炒Karen魷魚嗎？
Peter：唔係、唔係。我哋公司副主管個位丟空咗好耐，我諗住睇吓可唔可以升Karen職。我睇過佢啲客嘅買賣紀錄，包括謝太你個account，做得唔錯，所以先至睇吓好唔好升Karen。
謝太：升Karen好，不過升咗職嘅Karen仲會唔會搵我呢啲細客㗎？
Peter：會，一定會，我哋呢度升職加「辛」，只會係加辛苦嘅「辛」。哈、哈！
謝太：其實淨係Karen呢排叫我買賣江銅（358），出出入入都幫我賺唔少。最好嘢係佢上個禮拜叫我買恒指認沽證，去對沖手頭上嘅股票。我手頭上嘅股票就跌少少，不過隻恒指認沽證就升咗好多。
銅價有壓力
Peter：係呀，上個禮拜一，我叫佢同你講「即刻落車」，佢話「冇需要」，我都差啲鬧佢。不愧為長江後浪推前浪，你仲揸住啲好股都要多謝佢。例如，江銅今個禮拜就應該會升，仲分分鐘會上升好多，謝太，你可以考慮吓加注。我知道你已經買咗好多江銅，不如今次買埋江銅認股證。
謝太：江銅？聽講話銅價跌咗好多。
Peter：未跌過。
謝太：跌過。
Peter：未跌過！
謝太：啲人都話跌過。
Peter：未跌過！！銅價仲係徘徊喺高位，只係銅價波幅大咗。
謝太：不過我驚啲分析員會出盈利警告。
Peter：警告？佢哋警告我乜嘢呀？佢哋啲無知分析員，如果俾我撞到佢，一定會問佢：「你哋講咩？銅價有壓力，江銅有壓力，你做咩挑釁我呀？」我仲要佢道歉。銅價由最高位跌到𠵱家，只係跌咗4.3%，不過江銅就跌咗25.13%，仲唔買江銅認股證？我推介3640。
謝太：Peter幫我落盤買，不過我想問，Peter你係唔係住喺屯門？
Peter：謝太，你點知㗎？
謝太：係唔係搭巴士返工？
Peter：係呀，68X。謝太，你係住屯門？