恒指上周五回升近200點，港股短期已見底，開始反彈，完成後再尋底，上周低位能否守得住，係關鍵。
今次跌市，恒指由5月8日的高位17328回落，到24日的15674，共下跌1654點，若反彈跌幅的0.236、0.382及0.5，恒指目標為16064、16305及16501。
由高位回落，總共出現3個下跌裂口，分別係5月12日（17010至16967）、15日（16846至16674）及18日（16421至16363），通常1次技術性反彈/下跌，好大機會補回最近的1個裂口，因此，恒指反彈上番16300至16500區域的機會甚大。反彈完成後，會再尋底，15674若失守，恒指會進入第3浪跌市，唔排除會落番14000多點，但港股中期仍係看好，跌完後再起新升浪，恒指可再創今年新高。
康健國際（8138）股價表現大強勢，由4月中0.20元起步，個多月內升上0.30元，升幅達50%，近日大市雖跌，但康健在高位仍有好強承接力，唔排除有基金繼續收集。
業績已虧轉盈
英國保誠基金睇中康健，本月15日以均價0.26元增持2800萬股，令持股量上升到5.09%，需要作出披露；翌日，保誠再以平均價0.265元增持5575萬股，持股量上升到6.2%。保誠在康健大半年的高位水平仍大手增持，後市應睇得好好。
康健係本港最大私營醫療集團之一，旗下並有多個專科中心，包括牙科、皮膚科、眼科和植髮等。玩具大王蔡志明去年入股後，康健的發展加速，收購星虹（397）後易名為康健醫療，在佐敦區開設一站式綜合身體檢查中心，進軍體檢服務。
康健會計年度3月結算，04年及05年度都虧蝕8000多萬元，06年度的上半年已轉虧為盈，獲利1220萬元，而首3季更淨賺2020萬元，預計全年盈利可達2800萬元。
以康健的「晒士」而言（市值約15億元），賺二三千萬元確係微不足道的小數目，但由大蝕變小賺，已不簡單，轉捩後，加上開展體檢和內地業務，未來幾年盈利相信會以高速增長。
保誠已上車，有可能會繼續增持，亦唔排除會有其他基金加入行列，現水平入市，短線目標0.35元，止蝕0.28元，中線看0.45元。
郭兆誠