噚日天氣咁差，仍然有成過千人走出嚟要求平反六四，其實都算唔錯。支聯會主席華叔就最犀利，雖然已經75歲，但真係寶刀未老，行完全程都無索氣，而且仲快過好多後生仔，好多市民都豎起手指讚華叔：「勁」呀。
華叔都冇妄自菲薄，話自己真係唔攰，一啲辛苦都唔覺，身體真係幾好㗎。倒轉頭佢仲覺得遊行人士行得太慢，覺得自己用一個鐘零九個字，肯定可以由維園行到政府總部，噚日肯定係慢鬼咗至少三至四個字㖭，講起都仲好似有啲耿耿於懷咁。
點解華叔咁fit？睇怕都係因為佢都繼續keep住游水有關，華叔都忍唔住話：「我閒閒哋游一次水都至少45分鐘啦！」換言之，遊行嗰區區個零兩個鐘，對佢真係easyjob。華叔仲自備咗「遊行百寶袋」，裏面有啲咩？咪就係毛巾同衫之嘛，佢話呢啲係遊行必備嚟㗎。
傳真︰2623-9278
電郵︰[email protected]