富翁H位公子在新加坡嘅美國國際學校讀書，小H在美國出世，係美國籍，重以為佢會返美國讀大學㖭。但係富翁H想小H學習吓英國文化，唔好淨係熟悉美國流行事物，故此叫小H申請牛津劍橋。小H不負所望，得劍橋取錄嘞，佢話會入讀一間小書院，書院名氣當然與TrinityCollege呢類相差好遠，佢講完間書院名，轉頭左丁山已經唔記得咗，劍橋大學行書院制，共有三十一間書院，相信劍橋學生都未必記得晒。
小H之書院，學生人數只有三幾百，屬全宿全膳制，富翁H就係想小H徹底融入書院內，唔好畀劍橋大學之大搞到頭暈眼花。選大學，選書院，正是各花入各眼，你唔鍾意時有別人喜歡，千祈唔好以為自己唔鍾意小書院就一味反對，亦不可因為自己喜歡小書院而反對大得驚人嘅大學。賓架D畢業於西雅圖華盛頓大學，到UCLA攞MBA。好多年前佢話過：「我以為華盛頓大學已經夠大，點知UCLA重多學生，上堂好似趁墟。」前幾年左丁山到UCLA參觀，見過來自香港嘅教授T，知道UCLA有四萬學生，一啲課程每班有三百人，教授唔識同學，同學唔識同學。不過，仍然係好好嘅學校，在美國排名在前二十五名。
後來到PaloAlto見老友安森，佢辦公室就在史丹福大學出邊，佢帶左丁山入去參觀校園，真係靚到冇得彈，人見人愛，而且大大校園之內，唔多見人㖭，原來史丹福每年限收約一千五百名新生，只得六千名本科生，貴精不貴多，唔怪得排名高UCLA十零級。兩校主要分別係，史丹福係私立大學，大把捐款在手，唔鍾意多收學生就唔受。UCLA係州立大學，靠捐款之餘亦向加州政府攞錢，向加州納稅人負責，一定唔可以少收學生，故此愈嚟愈大。
香港八間大學都係公立嘅，每年限定收學生一萬五千人左右，UGC（大學教育資助委員會）派咗學額，大學唔可以話唔要，故此自從大學學位擴充之後，每間大學嘅學生亦按比例增加，想學史丹福呀，變成私立大學先至講。