「我都知百幾萬一部車並非人人都買得起，但今次平治這部新S500L，後座竟有最新式按摩椅，而廠方刻意把車身加長，令乘客有更多的伸展空間，全車用上最豪華的裝備如18吋胎軨、388匹新引擎、全新COMAND控制器……玩到咁豪，你話係咪唔買都要睇睇？」
記者：黃婉冰
攝影：黃子偉
模特兒：Crystal
「提升後座空間，配上兩張有多種模式選擇的按摩椅，一按掣，令我這個愛歎的女人不願下車。」
一向不會研究歐洲車，特別是Benz，感覺都只不過是身份象徵、外形夠大，總之坐得你好舒服、車價貴得很，就係咁多，我承認我的確好「賴衣褲」（膚淺）！自從揸過最新幾個型號後，先發覺它雖然身價昂貴，但總有令你覺得它值回票價的地方。好似今次這部全新S500L，新車長度比上一代增長43mm，齋睇外表唔多覺，但我試坐過後座之後，空間感確實又大又闊，膝部同前座椅背仲有段大距離。新車刻意將後座空間提升，讓後座有更多的「伸腳」空間，另一目的是讓後座Seat位作有限度調校，輕推按鈕，皮椅就會慢慢向前移動，椅背向後傾斜，感覺有如坐飛機位！這還未夠享受，最令人（特別是女人）一試鍾情，是藏在椅背內的按摩系統。試車時，我好似發現新大陸咁，原來後座椅背十足屋企張Osxx按摩椅咁幫你背脊「麥沙池」，愈按愈爽，坐到唔願走，如果俾我有幸中六合彩買到這部車，我發誓一定會請個司機，否則，後座這兩張按摩椅豈不是益人唔益自己？
「車身加長好難泊位？無問題，有個後波電視，可以揀埋泊S位定L位，睇住泊，唔怕撞。」
10個女仔9個憎泊車，我都唔例外，特別是在街邊眾目睽睽之下，扭10手軚都未入到位，瘀到即刻搵窿捐，這是當初我抗拒Benz的原因。跳上新S500L，原來司機位側的全新COMAND控制器，其中功能是讓司機自行選取泊S位或L位兩種泊車模式，跟住螢幕顯示的顏色線來泊，再加埋感應器提示，新牌仔都無問題，對我這個九流泊車司機來說，確是汽車界最偉大發明，值得一讚！你可能會問，車價百幾萬就只得咁多？非也，新車仲有前座氣墊調校，11個氣墊利用氣壓原理澎脹和縮小，可隨意移動椅背、椅墊高低和鬆緊，另外仲有電動窗簾、DIRECTSELECT電子7前速自動波箱……，齋玩全車Function都有排你玩，這個價錢買來一大堆高科技設備同享受，你話值唔值？
「7前速波箱加388匹馬力，以房跑車來看，外剛內柔，兩隻手指都可操控自如。」
新一代S500L外形完全脫離上一代那種方頭方尾的呆板設計，取而代之是有點跑格的流線外形，頭尾經過收身後，襯上大拋沙板、18吋胎軨，那種笨重感？No喇！外形變得靚仔，揸出街收視都唔弱。加上新車用上電子操控7前速波箱配388匹馬力引擎，0-100km/h只要4.5秒，聽落好強勁，但操控唔太難。軚波波棍細得如水撥推桿，軚環又輕又聽話，女仔揸？無問題，就連我6呎（差5吋半）都可用指圈住軚環控制自如，單手捽軚就更加無問題，但美中不足是在停定車，輕按電子手掣後，車身會輕微向後溜，第一次確實被它這舉動嚇了一跳！
平治S500L規格
引擎：5,462c.c.V8DOHC
馬力：388bhp/6,500rpm
扭力：530Nm/2,800-4,800rpm
傳動：7前速自動波
售價：$1,498,000
車輛提供：仁孚行（28957339）
