近日印尼嘅消息特別多，繼有港人在當地打麻雀被判監7個月，又傳來印尼地震死傷無數，咁啱財經圈亦有印尼消息，話說呢排成日搞特別活動嘅渣打，早一輪贊助完烏干達Watoto兒童合唱團，前幾日又喺分行搞咗個「印尼日」，搵員工着晒印尼服裝不特止，仲派糖畀啲Walk-in客。
除咗指定分行派糖之外，佢哋仲特地喺觀塘寫字樓，搞個員工Party，有印尼舞表演，問答比賽、大抽獎、印尼特產銷售，每個員工都有印尼蝦餅一大包，總裁蘇利民同一眾高層都到場齊齊玩，大家不知幾開心。
華華知道舊年渣打已經搞過「韓國日」，今年就輪到印尼，主要都係想表揚呢啲市場為集團帶來嘅貢獻。渣打話，佢哋早喺1863年就打入印尼市場，家吓喺當地7個城市已經有13間分行，員工數目有成1200人，發展算唔錯咁話。前日印尼發生地震，唔知佢哋嘅分行有冇受到影響？
13分行百年歷史
華華噚日見唔少喺香港嘅印傭，都自發籌款畀家鄉救災，咁渣打喺當地話晒都有百幾年歷史，早就係一分子，蘇利民會唔會搞番個「印尼賬災日」咁呢？
李華華
讀者如有任何意見或報料，歡迎發送電郵至[email protected]。