食飽唔憂米，從沒想過一個「餓」字會出自何超儀之口。直至訪問當日，筆者與經理人在Cafe等盛傳難約兼成日甩底的主角，見成事才多口問：「超儀係咪唔多願做呢類訪問？」「吓？點會？係你哋《蘋果》唔願意，話嚟嚟去去都係講唱片電影無新意，『翳』你哋都唔肯做。」
人云亦云，不如自己觀察。例子一：全世界話超儀寸爆，我金睛火眼留意，甚至挑戰式問佢：「覺唔覺自己已經變何家『熟』女？」結果她不怒反笑，「係呀，我熟晒㗎啦，皮鬆咗紋多咗。」例子二：何超儀甫出道即有老竇撐腰，理應一帆風順、目中無人，誰想到她會自謔為沒自信的醜小鴨，由衷說了句：「其實我一直好『餓』注意力。」
記者：陳慧茵
攝影：陳陶鈞
場地：MaryJaneCafe
部份相片：《壹週刊》
阿姆斯特丹尋根記
記得舞台劇《七重天》內，超儀飾演自小離開父母在台灣定居，對家族歷史一無所知，卻很想尋根的新一代。戲如人生，人人以為超儀是澳門人，其實，她在香港出世，10多歲到加拿大生活，「我認自己跟唔上香港節奏，喺加拿大生活咁多年，我都覺得自己鈍鈍哋。」香港人當她外省人，因為她混合荷蘭波斯美國中國血統，「直至有次去到阿姆斯特丹，望住當地人堂眉、雙眼，我心諗，嘩，乜你哋同我咁似，反而有尋根嘅感覺。」
AttentionSeeking
名門之後，萬千寵愛，「翳訪問」、「餓注意」，是錯出超儀之口抑或誤入小記之耳？星夢浮沉十數載，排除萬難仍要上位，8月將推出新碟，我只堅信「表演慾」只是入娛樂圈堂而皇之的藉口，訪問中途超儀說出心底話，「我一直好『餓』注意力，可能由細到大屋企好多人，無人會特別注意你，細個同老竇出街，途人只會指指點點，然後補充：『呢個咪何鴻燊個女囉。』我無自己身份，入娛樂圈，起碼有人會知我有自己才華。」
夢想做小忌廉
不憂柴米，卻飢餓於自己的身份。於是乎積極承繼父業抑或養尊做二世祖，都不是她渴望的路。何家一門多傑，要成名，惟有勇闖娛圈。「由細到大我都好有表演慾，幾歲時成家10幾人食飯，邊個邊個就會話：『阿妹，唱首安美露嚟聽吓。』咁我又『擦擦擦啲安美露……』咁唱畀大家聽。仲有，我細個好迷小忌廉，10幾歲就發明星夢。家姐又成日帶梅艷芳、張國榮、陳百強返屋企玩，睇住佢哋上電視表演，我好羨慕。」
老竇搵我頂澳姐
全世界以為超儀賺錢買花戴，離經叛道才誓要硬闖娛樂圈，誰知當初推波助瀾的，其實正是何鴻燊。「記得當年老竇有份搞澳門小姐，點知湊唔夠人數參加，於是同我講：『嗱，我一向唔贊成你入行，不過今次你肯幫我頂，可能會殺出條血路，你諗諗啦。』」沒戲劇性的黑幕，超儀沒有當選，因她臨陣退縮！「我當時成130幾磅，點着三點式呀！」繼而成功慫恿老竇讓她做當晚表演嘉賓，果然獲小型唱片公司羅致旗下，但合約條款談不攏，耗上一年光陰，最後連大學學位也丟了，明星夢始終發不成。
唔紅唔該你收皮！
有家底、有青春，的確夠條件浪擲光陰，好聽點便是再接再厲，91年某慈善大騷，她與張學友合唱《藍雨》，引來當時滾石高層李宗盛垂青，不過原來一切盡在計算之內，「家姐、成龍同埋陳自強穿針引線，睇準李宗盛當日會喺現場……」以為終於搭上順風車，約已簽了卻臨門殺出一個林憶蓮。不夠一年，李宗盛偕憶蓮遠走高飛，「我好記得佢哋臨上機前，李宗盛攬住我同我講：『你以後要自己照顧自己喇。』嗰一刻真係好灰！」從此她變成無主孤魂，要影宣傳相，高層請她自備衫上陣，她天真地捧着兩箱衫任人揀，「事後先知佢哋諗，你有錢你威啦咁Q多衫。」熬足3年，推出無人記得的首張國語碟、拍了無數爛片，家人一句：「唔紅唔該你收皮。」把她逼得更緊！
26歲後未靚過
信心跌至谷底，是多年前一次公開場合唱Live失準，公司下令她以後謝絕唱現場！以為是個自信爆棚的女子，訪問中聽得最多的卻是「我唔靚女，賣樣唔輪到我。」等自貶說話。「我覺得自己最靚係20至26歲，之後未靚過，尤其呢幾年老得好快，鬼妹就係有呢樣缺點。我唔係瓜子口面，塊面好多角，永遠影正面都唔靚，我個鼻樑愈大愈歪，諗過整容，但醫生話整完鼻孔會變大，咪搞，我寧願靠化妝遮住……」
信心回歸
千金小姐包袱令她時刻懷疑自己能力。某年某月，某電影監製找她演出耗資上億的大製作，超儀知道這是上位好時機，「點知臨開拍前俾我聽到傳言，話老闆原來搵過老竇投資，我好嬲，打畀家姐同佢講我唔拍喇，家姐鬧我話老竇都未應承，叫我唔好理咁多拍住先。」結果日日在片場嬲爆爆！電影內冷漠無情的觀艾原來是現實寫照。「拍完套戲我先敢問番件事，原來老竇根本無出過一分一毫。」那套讓她誠惶誠恐的電影於99年上畫，叫《紫雨風暴》。嶄露頭角後，03年的《豪情》更讓她登上第23屆香港電影金像獎最佳女配角。04年的一套《蝴蝶》，更令她吐氣揚眉，獲第10屆金紫荊最佳女主角提名，家人自此不再嘮叨，「我讀書唔成無嘢叻，淨係鍾意表演，亦只有工作，係唯一一樣我自己爭取返嚟嘅嘢。」
陰影「過繼」陳子聰
終於尋回「何超儀」，奈何身份模糊的不止她一個！看《四大天王》最印象深刻的一幕是陳子聰疾呼：「我叫陳子聰，有名你叫，我唔係叫何超儀老公！」昔日的「何鴻燊個女」變成今日的「何超儀老公」，超儀感受尤深；「聽到嗰下酸酸哋，我好明白佢感受，其實佢幾慘，換轉第二個眉精眼企嘅，可能一早走咗。好彩佢份人思想簡單，唔係好理其他人點諗。」儘管如此，仍然有閒言閒語說男方為的是錢。但在當事人眼中，卻是苦苦經營才修成正果的。相識時，男方緋聞多，英皇又不喜歡旗下藝人出夜街，兩年間，雙方互有好感卻沒有見面，只靠間中電話聯繫，「直至有次我病咗，佢煲中藥畀我飲，無幾耐先正式開始拍拖。」小記自認無用，始終沒有開口問她對所謂吃軟飯的看法，可能我跟超儀一樣天真，寧願相信歷經8年同居才步入教堂的關係，並非錢可買得到。
何家熟女
今日的超儀，談不上名成利就，但愛情、事業都有自己的定位，《豪情》、《蝴蝶》的演技被肯定，參與獨立製作如《香水》、《七重天》掙來藝術氣質，8月出新碟，上張碟《Sickid》自資推出賣電子音樂賣憤怒賣型格，今次Rock還是Rock，但加了流行元素，變成「PopRock」，「我搵黃貫中幫手，佢識平衡商業同個人風格，今次有人肯投資，點都要顧及商業考慮。」就連自信心亦明顯增長了，「覺得自己唱歌掂唔掂？今次進步咗，起碼把聲受控啲，我對自己有信心。」今日的何超儀，不是熟了是甚麼？
Profile
年齡：31歲
唱片：03年《Sickid》（華納發行/自資）、97年《說謊》（華星）、96年《何家淑女》（華星）、94年《造反》（滾石）
電影代表作：04年《蝴蝶》、03年《豪情》及《太陽無知》、02年《太太》（入選康城國際電影節）、00年《地久天長》、99年《紫雨風暴》
志願：做到梅麗史翠普咁嘅位，終生都可以做演員。
背景：澳門首富何鴻燊與藍瓊纓女兒，與何超瓊、何超鳳、何超蕸、何猷龍同房。
後記
有驚無險，訪問順利完成，回歸現實，我問了個無聊但好想知的問題：「出嚟做嘢咁耐，有無畀過家用屋企？」「哈哈，我第一份工，係滾石出糧，馬上拎住萬六蚊，好型咁成叠錢拎畀老竇，佢即時笑到碌地。」雲遊太虛，我在想萬六蚊兌換甚麼幣值的籌碼才最得體？超儀已自顧自說着：「平時拍戲搵得幾多？唔係大數目對我嚟講分別唔大，我其實希望好紅，咩為之紅？Kelly咁咪叫紅囉。」哦！