一講起美國萬通，好多人第一時間就諗起佢哋個「小太空人」計劃，華華上周同佢哋位副總葉嘉年食飯，佢話小太空人下個月28日又開波，今次仲搵嚟外展訓練學校幫佢哋設計考核課程，考驗吓班細路嘅自信心。點考？咪要班小朋友喺離水面兩三層樓高嘅渡頭上，跳落海囉！
講完小太空人計劃，葉副總又自爆公司唔少員工，都怕喺辦公室樓下見到大老闆，唔係因為做錯嘢，而係老闆最鍾意行樓梯，咁身為下屬梗要睇老闆頭，唔通阿頭行樓梯，你就走去坐𨋢咩！雖則由地下去到Office，只係12層樓，之不過平日少做運動，一下子要行咁多級，都咪話唔辛苦！
同好多男士一樣，葉副總另一樣擔憂嘅，就係頭上的煩惱絲，佢話試過好多方法，都唔係太有用，家吓用平常心面對，不過講係咁講，一見華華要影相，佢就第一時間話：唔好影到個頭頂呀！