周慧敏（Vivian）前晚在紅館演出尾場個唱，貼身男友倪震（Joe）神秘地扮愛貓周慧豹出場，Vivian為此感動得當眾落淚，全場觀眾在古巨基帶領下向二人迫婚，大叫：「周慧敏好波，快啲嫁Joe哥。」加上為歌迷的熱情所感動，Vivian全晚四度落淚，玉女掌門人變成新一代喊包。
周慧敏一連三場的Backforlove2006演唱會前晚在紅館圓滿落幕。林子祥、古巨基及谷祖琳任表演嘉賓，周慧敏整晚四度落淚，其中兩次談到歌迷對她支持及等她開個唱十分長情，感動而哭，後來她彈琴時想到以往忘了怎彈首本名曲《最愛》，又感觸落淚。
「唔好講出嚟」
嘉賓古巨基出場帶領歌迷大叫「周慧敏好波」後竟說：「周慧敏好波，我去咗摩洛哥。」又謂有小朋友去士多時說：「周慧敏好波，我想要支益力多。」
搞完笑後，周慧豹公仔上台獻花，竟要求Vivian錫他，又想擁抱Vivian及基仔，但遭基仔拒絕說：「嘩，你唔好以為你真係一隻公仔，你係人扮㗎！唔好抽水，你咁過份，等我睇吓你係邊個？」基仔強行拿下其面罩，Vivian赫然發現原來是其男友倪震，忍不住感動哭泣，要拿紙巾拭淚，基仔說：「Joe哥話想扮豹仔畀驚喜Vivian，叫所有人唔好講出嚟。」
全場歌迷興奮起哄，Vivian二話不說將手上鮮花掉落地，衝去與男友相擁合照，基仔竟帶頭迫婚，更與全場觀眾齊聲大叫：「周慧敏好波，快啲嫁Joe哥。」倪震即跪下攤開雙手，並說：「我只得五個字，最愛周慧敏。」Vivian冧到不能說話，體貼地為男友抹汗，恩愛之情羨煞旁人。
未打算結婚
事後Vivian在慶功宴接受訪問，對於有傳她與倪震在四季酒店訂了酒席準備結婚，她說：「我𠵱家未有結婚打算。」如果個唱上倪震跪下求婚又如何？她說：「真係先算啦，好多謝今晚咁多嘉賓，請得嚟嘅都係我演藝生涯中好重要嘅人。」
至於涉嫌捲入毀約事件，有贊助商要告其個唱主辦單位恒藝亞洲未能履行贊助合約，Vivian說：「我睇報紙先知，唔關我事，我只做好歌手本份，呢啲嘢交畀主辦單位去搞。」
採訪：胡比
攝影：仇志德
