除咗冬瓜、豆角、莧菜喺夏天當造菜之外，雨水多嘅日子，通菜就係最啱時令最靚嘅蔬菜。本地通菜夠靚又新鮮，買菜時，應揀短身嘅，啲葉寬大無黃斑就為之靚。
通菜係帶寒涼嘅瓜蔬，所以煮時多數要用薑、蒜同埋紅椒之類嘅辛熱食品中和吓。通菜清熱而潤腸胃，如果唔想食來食去都係炒，或者白灼淋上腐乳，可以試吓滾湯，另有一番風味。以潮州普寧豆醬、2両子薑、半斤水瓜、半斤通菜、鹹肉碎作材料，首先將半肥瘦豬肉洗淨剁碎，加上1茶羹鹽一起剁。水瓜切角，通菜擇段，子薑切粗絲，子薑炒香加水滾，滾後加入肉碎，5分鐘後加入水瓜，再5分鐘後落通菜，然後用豆醬調味。呢個湯不寒不燥、潤而纖維足，清鮮好飲。