上個禮拜四晚，孫柏文有機會去聽陳方安生演講，聽完之後又開心又唔開心。未去之前，聽到有人放風話陳太會喺佢演詞裏「重要聲明」。雖然，好多政經口水佬聽完演講之後，都唔同意陳太有講過「重要聲明」，不過孫柏文聽完之後，就非常同意陳太有講過「重要聲明」。呢個分別，係因為啲同行淨係關注陳太究竟會唔會參選特首，其他嘢就好少理。
大家作為《金手指》嘅fan屎，都知道我對特區人民「私隱權」嘅執着。上個禮拜四晚，陳方安生開口埋口都喺度重複又重複咁講雅虎香港（yahoo.com.hk）「好自願、好合作」咁，將啲用戶資料上繳中央政府，係好唔妥當。陳太又話，雅虎香港咁做，可能侵犯咗我哋特區有關保障私隱嘅條例。雅虎香港出賣用戶私隱，搞到有記者喺大陸俾人拉咗呢單嘢，如果大家都係雅虎香港嘅用戶，就可以預期雅虎香港下一次出賣同擺上神枱嘅，分分鐘都可以係你同我。
陳太高姿態的背後
所以聽到陳太咁關注呢單嘢，仲話希望政府查清雅虎香港究竟有冇犯法，我感到好鼓舞。原來，擔心科技進步會對私隱構成威脅嘅唔係淨係我。陳太好嘢！
大家知道孫柏文點解聽完陳太演講咁開心，就可能會問：「陳太都勁支持私隱嘞，點解孫柏文又會唔開心呢？」今次陳太咁高姿態講雅虎香港出賣記者呢件事，其實係陳太究竟想唔想選特首嘅一個「重要聲明」。大家都知道，中央政府係會用盡一切手段去維持一黨專政，當一個人高姿態話，中央政府做嘅嘢唔啱嘅時候，仲唔係擺到明同中央唔妥？咁陳太仲唔係高姿態將「選特首」呢條路，永久性埋藏？所以嗰啲聽完陳太演講之後，話放風陳太有「重要聲明」嘅人係「流嘢」嘅政經口水佬，仲唔要檢討檢討自己，點解仲要留喺呢行？
何耳緣嘅行動訊號
禮拜六早上，兩個朋友大駕光臨嚟到我嘅辦公室，第一個就係大家都熟悉嘅《利字當頭》一欄總舵主利世民兄，第二個就係世民兄同我嘅老友何耳緣兄。咁今日為大家介紹耳緣兄呢個人嘅原因，就係我相信佢係一個非常之好嘅出入市訊號。何耳緣、世民兄同我，都係相信自由市場主導經濟政策，不過何耳緣唔同嘅地方，就係佢完全唔清楚股票市場運作。原本我都唔知道佢係「股市盲」，不過禮拜六佢問咗我一個問題，就咁敗露咗佢係「股市盲」，耳緣兄話：「乜買股票要開戶口咩？」
咁點解我話何耳緣兄係個出入市訊號呢？就係當連「股市盲」都話要入市嘅時候，就係大家要出貨嘅時候。幾個禮拜前，耳緣兄佢打電話畀我暢談天下大事，講到大陸銀行壞賬問題嘅時候，佢突然問我：「中國銀行就嚟上市，我老竇叫我買，咁我好唔好買？」當時我仲未知道佢係「股市盲」，不過諗番轉頭，佢問我好唔好買中行嗰日，就係股市見頂嗰日。
不過最後，大家唔使驚，我覺得股市應該會反彈，因為最後，何老父叫何耳緣返屋企填申請表格嘅時候，何耳緣怕輸錢冇填表，就連屋企都冇返。
孫柏文