港股初步見底，撈貨要趁早。中國財險（2328）今年7月1號有好嘢，咪走雞。春江鴨上周喺低位收集，現價兜貨，短炒博由2.45元上2.95元賺20%，7月之後博上3.60元賺夠47%。
7月1號係香港回歸9周年，本來與中財險冇乜關係，但適逢內地由7月1號起強制執行汽車第3者責任保險，中財險嗰瓣開正，今回發大財矣。股價可追番落後中國人壽（2628）與平安保險（2318）部份長期失地。
中財險係國內非壽險龍頭，佔市場達51.5%。05年度（12月年結）淨保費收入中，汽車保險佔總數73.2%，比04年度70.7%再增2.5個百分點，顯見汽車保險對中財險嘅重要程度。
中國保險監督委員估計，國內現有1.3億汽車中，只有4600萬輛有投第3保，佔總數不過35%。7月1號第3保強制執行後，中財險將豬籠入水。
令人心郁郁
以中財險佔市場比率計，8400萬輛未投第3保汽車中，會有4330萬輛幫襯中財險。好快趣，中財險第3保客戶，大增1.8倍。即使打個8折，只有3460萬輛幫襯，增幅亦達1.5倍，係咪犀利呢？
國內強制執行第3保，係短炒中財險最利好因素，其他令人心郁郁嘅因素，隨便可以執幾個。
第一、大落後。年初至今，國壽累升60%（連股息），平保累升46%，而中財險則只升5%。
由掛牌開始計，中財險更加落後。國壽（03年12月上市）現價較招股價高出212%，平保（04年6月上市）現價較招股價高出110%，中財險（03年10月上市）只上升36%。中財險質素冇人哋咁好，但都唔應該落後咁多條街。
第二、PE低。中財險06年度預測PE13.9倍，遠遠低於國壽嘅24.8倍及平保嘅25.7倍，較兩者平均低4成半。
第三、P/B吸引。中財險P/B1.68倍，國壽3.86倍，平保4.21倍。中財險P/B較兩者低近6成。
街貨少好易砰砰聲
第四、日後稅務着數。中財險去年稅前盈利22.03億元（人民幣．下同），稅項支出高達10.90億元，有效稅率高達49.5%。望落去唔妥，實係好嘢。畀咁多稅，係因為蝕本生意冇得同賺錢生意溝埋一齊計，結果賺錢生意按正常稅率（一般30%）畀稅，蝕本生意冇得扣稅。好嘞，將來蝕本生意賺番錢，可先抵銷以前蝕本數字然後至要畀稅，將來集團嘅有效稅率，一定下降，對純利增長一定有着數。另外，國內有意將來將稅率調低，聽講會降到24%，對畀足稅嘅中財險亦有利。
第五、大摩揸重。大摩今年3月尾揸到要披露，持股量5.56%（1.923億股），至5月22日，增至9.29%（3.212億股）。新買嘅1.289億股，有部份高價買入，例如4月21日買入平均價3.38元。老貓通常唔會燒鬚，現價上車平過大摩好多。
最後，睇吓街貨。國壽掛牌嘅H股市值高達837億元，平保H股亦有546億元。中財險H股則只有83.8億元，只係國壽嘅1成同埋平保嘅1成半。減去美國AIG所持31.92%與大摩嘅9.29%，中財險街貨41.21%只值34.5億元。基金大戶一郁手，中財險好易砰砰聲。
高彰坡