天才、奇人霍金在六月中來港，到科技大學演講，人未到，先轟動，據講中學生上網下載申請聽講門券嘅表格，令到網站癱瘓，香港學生如此喜愛科學，值得高興。有人問左丁山去唔去，講真，即使有人請，都冇謂浪費一張門券，自己對高深科學理論完全不懂，聽「黑洞論」，只會聽到自己腦袋發黑。諾貝爾獎物理學獎得主丁肇中上個星期在港對學生演講，大受歡迎，教授L對左丁山解釋，丁肇中係目前炙手可熱嘅科學家，有幾十位博士跟住佢研究「反宇宙」（Anti-Universe），唉吔，「宇宙」已經難明，「反宇宙」更令科學盲如左丁山跪地投降，急忙對教授L講：「請慳番啖氣，唔使再講解咯。」教授L話丁肇中對中學生講考試名次沒一點意義，非常精彩，如有辦法搵到演講紀錄，值得叫下一輩重溫幾遍。
拜中學四年級開始就文理分科所賜，左丁山呢位文科生對科學理論一直無法掌握，中三以後就冇讀過物理化學，點識噃。聽諾貝爾獎得獎人演講，只識聽經濟學獎得主，譬如蒙代爾教授（RobertA.Mundell）講中國經濟、人民幣滙價等。另一位RobertAumann教授講「戰爭與和平」（WarandPeace），發揮博奕論，將理論引申到現實世界及戰爭，人人聽完，都話精彩。左丁山遺憾因事冇到現場聽講，有老友用心聆聽，向左丁山轉述概要，講及MutuallyAssuredDestruction（MAD）概念，可圈可點。冷戰高峯期間，美蘇兩國，甘迺迪與赫魯曉夫唔癲得晒，古巴危機之時，臨崖勒馬，就可能因為怕咗MAD！
小李在旁邊聽到，活學活用，佢話：「呢個概念我都明白，打麻雀之時，自己手牌曳，上家已經露出清一色萬子格局，九張落地，要包牌，為咗自保，我特登打筒子放下家，等下家都筒子九張落地。於是上下家為咗食出，互包對家，我就繼續死守，希望佢兩位是但一位包中對方，咁就唔使畀錢，呢樣算唔算係互相保證滅亡呢！」
用麻雀做譬喻，講吓笑啫。老友話大老闆聽完歐曼教授演講，意猶未盡，想發動幾十名高層與佢一齊到大學，請博奕論專家講課喎。