近來報紙上最紅的女攝影師名字叫戴妮廷（Eydie），平日去ball似印度西施，化濃妝、低胸露乳溝，熱情奔放，早前更穿三點式拍美容院廣告。不過露肉背後，戴妮廷還有一串明星客戶list，由已故的張國榮和梅艷芳，到鄭秀文（Sammi）和任賢齊等。原來戴妮廷與Sammi情同姊妹，曾想過放棄攝影的她，更因Sammi的一番說話而繼續留守影樓。 撰文：林妙萍
訪問當天，戴妮廷在中環影樓為RoadShow主持Viann影宣傳照，戴着粗框眼鏡的她，束住一頭亂髮，穿上闊袍大袖的舊Tee和布褲，與平日出席公開場合的形象大相徑庭，記者第一眼也認不出她。訪問時，她透露小時候比較害羞，不懂與人溝通，讀聖保祿中學時只愛做運動健將，皆因跳舞和打波不需講話，她說：「嗰時我係插班生，老師叫我入攝影班，我咪入囉！嗰時我太粗魯，拎機都唔識，跌過好多次落地。」
學懂多講多笑
亂打亂撞卻愛上這個興趣，亦發掘了自己的天份，17歲代表學校出國參加藝術節，當時的作品是拍攝一個小朋友，她表示至今仍愛影人像，她說：「你叫我影fashion、影events我一定唔夠人好，因為我冇耐性，我鍾意影人嘅表情、眼神，最focus係相中人嘅一對眼。」性格影響人生，Eydie指到紐約發展的數年，令她性格變得主動，多講、多笑、多擁抱現在成為她的習慣，她說：「同美國人溝通一定要主動，熱情積極，唔係就自己蝕底。」
拍好友真性情
Eydie透露最滿意的作品，約是十年前為契姐鄭秀文拍攝的唱片封面相，她說：「嗰日得我同佢兩個人，連妝都係佢自己化，影得好快，個半鐘影完。嗰輯相都係我最鍾意嘅，影得佢好自然、影到佢嘅真性情。」Eydie謂與鄭秀文識於微時，十三、四歲學生妹遇上當時剛參加新秀的Sammi，兩人一見如故。在迷惘時期，靠着Sammi的鼓勵，Eydie繼續攝影工作，她說：「幾年前喺台灣，影咗好多星，但好趕，趕到啲相未睇過就要pass畀雜誌登，影到個人冇晒靈魂，唔知做緊乜。我同契姐講話我要轉工，但佢同我講：『你影得幾好，仲有空間進步，其實應該更加努力！』我聽完先決定留低。」外間一直指Sammi脾氣大，Eydie則說：「我唔知佢對其他人點，但佢對我好好。」
除了明星外，Eydie近年也為名人名媛如傅明憲和艾永玲等影相，她說：「對privateclients一般都係用番菲林，之後畀番晒啲底片佢哋，我就留幾張做record或者將來展覽用，主要講個信字，同埋我都好光榮（榮幸），得到佢哋respect同支持。」她續說：「明星都冇問題，唔難溝通，反而身邊嘅助手、保母就意見多多，太過份我出聲㗎：『Sorry，我要多啲空間，唔該唔好企咁埋我度！』」問她哪個明星最難相處？她非常識做地說：「都幾好，冇乜嘢！」
趁青春晒性感
戴妮廷兩、三年前回流返香港發展，出入ball場和派對，熱情兼性感，她直言樂在其中：「香港ball場？好玩，大開眼界。人哋畀咁多錢、搭晒景、諗晒主題，畀你玩一晚喎，點解唔havefun啫？」不怕被指性感博見報嗎？她說：「性感？我更加唔介意，唔通等到60歲，皺晒皮先嚟showoff，我最介意係唔該唔好影得我肥。其實着得靚自己開心，身邊朋友都高興，唔好失禮呀。」
相片由戴妮廷提供
