鄧萃雯入行21年，演過無數角色，由風塵女子演到女強人，無論是《金枝慾孽》的如妃，抑或是《女人唔易做》的Hilda姐，都教人津津樂道。然而，雯女坦承自己有很多缺點，更慨歎年輕時由於太過渴望戀愛，結果每段情都不能維持長久。 撰文：卓美娟
從劇集《金枝慾孽》的如妃到《女人唔易做》的Hilda姐，鄧萃雯演活了兩個不同時代但性格同樣強悍的女人，都是為求目的而不擇手段，由清代的宮廷鬥爭至現代的辦公室政治，雯女都演繹得絲絲入扣，專橫霸道得來又不失人性化一面，難怪兩個角色同樣令觀眾又愛又恨。最近播畢的《女》劇收視更刷新了本年度周日劇集大結局的最高收視紀錄，雯女演技備受肯定之餘，同時也成為收視長勝將軍。
相信神安排
前年播出《金》劇時，雯女飾演的如妃大受歡迎，原本是台慶「我最喜愛的女主角」大熱人選，最後卻大熱倒灶，敗給同劇飾演玉瑩小主的黎姿，事後有不少雯女支持者戥她不值。無綫同年開拍《胭脂水粉》，又傳出曾試造型的雯女因不滿失獎而辭演，更得罪了無綫。去年無綫以《金》劇班底開拍《火》劇，雯女竟然被飛出局。直至去年雯女終於接拍《女》劇，由於劇集乃小品式題材及小成本製作，當初開拍時並未受到廣泛注意，實在難以與投資千萬的《火》劇相提並論，不過又有誰可想到兩套劇同期播出時，有強勁宣傳攻勢的《火》劇，收視居然敗於《女》劇？雯女有如平地一聲雷，再受觀眾注目。
問到雯女當初得知沒份演出《火》劇有何感覺？她起初語帶惋惜的說：「初初都有少少哎呀！女主角之中得我同張可頤冇份拍，因為知道阿戚（監製戚其義）嘅劇有一定水準，會有啲失望。」雯女平淡的說：「不過知道被Ada（蔡少芬）同Maggie（邵美琪）兩個取代就唔同喇，兩個都係我鍾意而又期待睇嘅。」
身為虔誠基督徒的雯女相信一切是神的安排，她說：「如果拍咗《火舞黃沙》，就唔會拍到潘嘉德呢套咁好嘅《女人唔易做》，有邊個、冇邊個都有神嘅意思，所以唔需要去介懷啲乜，感覺好快會過去。」
亂愛種惡果
入行21年的雯女演過無數角色，每個角色也反映不同個性的女人，最近她接拍了新劇《師奶兵團》，飾演普通屋邨師奶。問雯女覺得現實生活的自己又是怎樣的女人時，雯女想了一會說：「唔同階段有唔同性格，以前好多嘢都會隱藏，唔想面對，甚至覺得自己好差、好多缺點，返咗藝人之家後，我有好大嘅反省同反思，明白好多時因為某啲遭遇令自己有咁嘅性格，之後聽道、睇聖經同心理書，研究自己細個點解咁恨拍拖，好似口渴就想飲水，亂愛咪造成更多唔好嘅效果，點解每段感情都唔長。」
雯女表示只是近三年才開始有改變，懂得寬恕及體諒別人，她說：「曾經有個男朋友，雖然最後大家都分開，其實一直感受到佢完全接納我，令我好感動，不過當時我未認識真正嘅愛，我未懂事阿爸、阿媽就分開，好缺乏安全感，每次都因為渴，好快就開始一段感情。呢三年先唔再渴，開始學習接受自己，既往不咎，好大嘅釋懷。」
下世做男人
雯女表示對人生的態度有轉變，引伸至演戲時也會更懂得去處理不同角色，她說：「睇個角色會去到更深層，縱使係大家認為好強悍嘅人，入面都總有根源，睇得清晰會感受到個角色性格係點變，呢幾年好易同好快咁入到角色度，好似上身。好耐之前要飾演一個好姣、好cheap嘅風塵女人，我唔鍾意女人用呢啲伎倆，夏雨同我講話呢啲係女人嘅本錢，可能我內裏真係有呢啲元素，不過當時唔會將佢釋放出嚟。」
未知是否這輩子在戲中演出太多形形色色的女人，雯女竟然表示若有得選擇的話，下輩子會選擇當男兒，她說：「女人要喊就好似排毒咁，女人絕對係唔易做，着高踭鞋、生仔、月經、扮到好靚畀男人睇，都係辛苦自己。呢個年代嘅女人更加要背負家庭、工作等一大堆問題。所以《女人唔易做》成功都有原因，講緊嘅可能係身邊發生嘅事，Hilda姐同如妃可能係喺你身邊出現嘅人。」
攝影：陳俊強
場地：MarcoPoloHotelsHongKong
服裝：BCBGMAXAZRIA
