歐倩怡歷久常新
「隻錶買咗成十年，係我送畀自己嘅禮物，以前阿爸阿媽同我講，話要有一件半件嘢可以戴得出嚟撐場嘅，而且呢個款都好襟興，𠵱家戴番都唔覺out。我知好多人都會買白色錶肉，啡色錶肉比較少人戴。我唔可以戴皮帶錶，因為隻手會損㗎！」
譚小環大面夠型
「呢隻錶其實係我男朋友嘅，佢知道我好鍾意大隻嘅手錶，我估佢因為咁而買啩。其實我鍾意錶面大之外，呢隻錶係鋼帶，好有型，我唔係咁鍾意幼錶帶。雖然我咁瘦，不過戴咗隻大錶就好似幾型咁。以前我都鍾意儲錶，Swatch、G-shock我都有幾隻，但𠵱家已經冇儲啦。」
葉翠翠米奇擁躉
「我好鍾意米奇老鼠，有乜嘢都會盡買。呢隻錶我一見到就已經忍唔住要買喇，因為佢哋好少出幼身錶帶，所以我見到呢隻就即刻買咗佢。雖然我戴皮帶會好易敏感，但呢隻錶帶幼啲，好似睇落斯文啲，米奇老鼠又幾可愛，都幾好。」
李思雅日夜變臉
「多啦A夢係我最鍾意嘅公仔，有次行商場見到呢隻手錶就買咗喇！呢隻係限量版手錶，佢同普通手錶唔同，錶面圖案會因應唔同時候而轉，日間個錶面會出現太陽，如果係夜晚，就會轉咗做月亮，我覺得好得，同普通錶有少少唔同。我朋友都有買多啦A夢手錶畀我，好多都靚到唔捨得戴。」
採訪、攝影：王崇穎、王連連、楊潔雯
