祥仔98年拍攝電影《殺手再培訓》，初嘗擔正滋味，卻碰個焦頭爛額：「我發現最大問題係我唔識得做主角，唔識控制起承轉合同掌握成個節奏，係跌入一個陷阱。結果成日錯過好多應該做嘅嘢，做咗好多唔應該做嘅嘢，做呢次主角係好慘痛嘅經歷。」至於在無綫開拍的劇集《包青天》裏，祥仔擔正過其中一個單元：「我做配角咁耐，心中好嚮往做主角，望咗咁耐終於有機會，成日顧埋外表，差啲變埋鏡神，但一顰一笑係老套到不堪，陰功㗎！」
減肥30磅
談到最滿意演出，其中一部是91年的劇集《情陷特區》，他說：「我飾演大陸知識分子，題材正面，有成三個月時間做準備，我減肥30磅做㗎！大陸拍外景嗰陣，休息就攞本書睇，完全同角色融入，過程好難忘。」至於前年劇集《楚漢驕雄》，祥仔一改小人物戲路，飾演漢初三傑兼開國將軍韓信：「個角色係由零至成長至衰，由零到一百，我成世人都冇一個角色咁齊全，仲要配合埋歷史，唔容易㗎。」